ԵՐԵՎԱՆ, 30 ապրիլի – Sputnik. ՀՅԴ խմբակցության անդամները քվեարկելու են Նիկոլ Փաշինյանի օգտին։ Այս մասին այսօր՝ ապրիլի 30-ին, ԱԺ-ում Նիկոլ Փաշինյանի և ՀՅԴ խմբակցության պատգամավորների հանդիպումից հետո նշեց ՀՅԴ խմբակցության ղեկավար Արմեն Ռուստամյանը:
Նա նշեց, որ քննարկման ընթացքում անդրադարձել են իրենց համար սկզբունքային հարցերի՝ ներքին և արտաքին քաղաքական։ Դրանց շուրջ տեսակետները հիմնականում համընկել են։
«Մենք շատ հստակ պատկերացնում ենք, որ վարչապետ դառնալուց հետո առաջանալու է նոր իրավիճակ Հայաստանում և այդ նոր իրավիճակի մասին ենք խոսել Նիկոլ Փաշինյանի հետ»,- ասաց նա:
Ռուստամյանն անդրադարձավ նաև ԱԺ արտահերթ ընտրություններ անցկացնելու հարցին։
Նա ընդգծեց, որ բովանդակային առումով լուրջ տարբերություններ չկան իրենց մոտեցումներում։
Արտահերթ ընտրությունները Հայաստանում կկայանան միայն Ընտրական նոր օրենսգրքի ընդունումից հետո։ Ռուստամյանը նշեց, որ դրանք պետք է կազմակերպվեն ողջամիտ ժամկետներում, բայց ոչ ավելորդ շտապողականությամբ։
«Սահմանադրությունը դրա համար 3 տարբերակ է նախատեսում։ Ամենաարագը վարչապետ չընտրելն է։ Բայց դա ճիշտ ճանապարհ չէ»,- ասաց նա։ Ռուստամյանը։ Նա մերժեց նաև երկրորդ՝ կառավարության ծրագիրը չընդունելու տարբերակը։ Նրա խոսքով` ամենաճիշտ տարբերակը Սահմանադրությամբ նախատեսված երրորդ՝ կառավարությանն անվստահություն հայտնելու տարբերակն է։
«Կառավարությունն ԱԺ կներկայացնի իրեն անվստահություն հայտնելու նախագիծ և ԱԺ-ն այն կընդունի»,- ասաց Ռուստամյանը։
Բայդ դա, նրա խոսքով, շուտ չի լինի, քանի որ մինչ այդ ԸՕ-ը պիտի բարեփոխվի, ռեյտինգային ընտրակարգը վերցվի և ձևավորվի համահայկական էլեկտրոնային ընտրական համակարգ, որը կբացառի կրկնակի ու կեղծ քվեարկությունները։
