ԵՐԵՎԱՆ, 29 ապրիլի — Sputnik, Անի Լիպարիտյան. Սեր առաջին հայացքից, Sputnik Արմենիայի հետ զրույցում Հայաստանի նկատմամբ վերաբերմունքն այսպես նկարագրեց ռուս կարատեիստ Աննա Ուլիբինան։
Նա Հայաստան է եկել այս տարվա ապրիլին` կարատեի Եվրոպայի առաջնությանը մասնակցելու նպատակով։ Մարզիկը ոչ միայն հաջող ելույթ է ունեցել մրցումների ժամանակ և բրոնզե մեդալ նվաճել, այլև բազում դրական հույզեր ու տպավորություններ ստացել մեր երկրից։
«Հայաստանում հինգ օր եմ անցկացրել։ Ցավոք, առանձնապես չհաջողվեց զբոսնել. ժամանակ և հնարավորություն չկար», — ասաց Ուլիբինան։
Ամեն դեպքում նա հասցրել է տեսնել Հանրապետության հրապարակն իր երգող շատրվաններով ու Կասկադը։ Երևանի ճարտարապետությունն անտարբեր չի թողել Աննային։
«Սիրահարվեցի առաջին հայացքից», — խոստովանեց մարզիկը։
Նա խոստացավ Հայաստան վերադառնալ որպես զբոսաշրջիկ, որպեսզի հանգիստ զբոսնի Երևանով, տեսնի արվարձաններն ու այցելի երկրի մյուս քաղաքները։
«Այն համայնապատկերը, որը կարելի է տեսնել Կասկադի վերևից, ապշեցնում է. քաղաքի ու Արարատի հիասքանչ տեսարանը պարզապես ապշեցնում է։ Լեռներ շատ եմ սիրում և երեխայի պես ուրախանում էի դրանց նայելիս», — ասաց մեր զրուցակիցը։
Մարզիկը խոստովանեց, որ շատ կուզեր դիտահարթակում ավելի երկար մնալ, մեկուսանալ ու գիրք կարդալ` մեկ բաժակ թեյ ըմպելով։
Աննան հասցրել է տեսնել նաև Էջմիածնի պատմական վանքերը, լինել Խոր Վիրապում։ Նա հասկացել է, որ յուրաքանչյուր զբոսաշրջիկ սեփական աչքերով պետք է տեսնի Հայաստանի տեսարժան վայրերը։
Նա համտեսել է նաև հայկական խոհանոցի ուտեստները։
«Խորոված կերա, ժենգյալով հաց, գաթա, լավաշ, մուրաբաներ… Շատ համեղ էին», — ասաց Աննան։
Կարատեի Եվրոպայի առաջնության բրոնզե մեդալակիրը չի կարողանում իր ուղևորությունից ամենավառ տպավորությունն առանձնացնել, որովհետև Հայաստանը նրա համար իսկական բացահայտում է դարձել։
Այժմ մեր երկիրը նրա մոտ ասոցացվում է Արարատի, արևի, Սևանա լճի և համեղ խորտիկների հետ։
Մարզիկը տեսածը հավերժացրել է լուսանկարներում ու տեսանյութերում, որպեսզի պահպանի արևոտ Հայաստանի հուշերը։
