ԵՐԵՎԱՆ, 28 ապրիլի — Sputnik. Ռուսաստանի Պետդումայի պատգամավորները այսօր կհանդիպեն ՀՀ վարչապետի թեկնածու Նիկոլ Փաշինյանի հետ։ Այս մասին Sputnik Արմենիայի հետ զրույցում հայտնեց Պետդումայի ԱՊՀ հարցերով հանձնաժողովի նախագահ Լեոնիդ Կալաշնիկովը։
Այս հանդիպման ընթացքում պատգամավորը ակնկալում է հստակ պատասխաններ ստանալ, թե ինչպես են Փաշինյանն ու իր թիմը տեսնում հարաբերությունների հետագա զարգացումը Ռուսաստանի հետ։ Այսօր ռուս պատգամավորներն արդեն հանդիպել են «Ելք» խմբակցության հետ, որը ղեկավարում է Փաշինյանը։ Սակայն ինքը` Փաշինյանը, հանդիպմանը ներկա չէր, քանի որ նա Վանաձորում հանրահավաք էր անցկացնում։
«Մենք կխնդրենք հստակ պատասխանել։ Ինձ թվում է, Փաշինյանն այդ պատճառով է հանդիպում խնդրել։ Ուզում եմ ընդգծել` մենք ոչ ոքի ոչ մի կոչ չենք անում ու ոչինչ չենք քարոզում։ Ինձ համար կարևոր է իմանալ` ինչպիսի համագործակցություն ենք ունենալու ու ինչպես է նա վերաբերվում մեր ինտեգրացիոն գործընթացներին։ Եթե մեկ տարի առաջ նա պահանջում էր դուրս գալ Եվրասիական տնտեսական միությունից, ապա ինչ է մտածում հիմա այդ մասին։ Վաղը մենք կքննարկենք այդ հարցերը։ Իսկ թե ում ու ինչպես կընտրեն, կրկնում եմ` մենք չեն պատրաստվում միջամտել», –հայտնեց Կալաշնիկովը։
Նշենք` այսօր Վանաձորում հանրահավաքի ժամանակ Փաշինյանը հայտարարել էր, որ ընտրվելու դեպքում չի պատրաստվում պայքարել Հայաստանի` ԵԱՏՄ–ից ու ՀԱՊԿ–ից դուրս գալու համար, սակայն ուզում է ավելի ակտիվ պաշտպանել Հայաստանի և՛ տնտեսական, և՛ պաշտպանական շահերը։
Նիկոլ Փաշինյանը ՀՀ վարչապետի միակ թեկնածուն է։ Ընտրությունները ՀՀ ԱԺ–ում կանցկացվեն մայիսի 1–ին։ Ապրիլի 28–ին Հայաստանի խոշորագույն` Հանրապետական կուսակցությունը հայտնել է, որ իր թեկնածուին չի առաջադրի։ Ծառուկյան ու Դաշնակցությունը նշել են, որ կաջակցեն «ժողովրդի թեկնածուին»։
Ապրիլի 27–ին ու 28–ին ռուս պատգամավորները հանդիպումներ անցկացրին հայ գործընկերների հետ Հայաստանի խորհրդարանում։ Նրանց դեռևս չի հաջողվել Փաշինյանի հետ հանդիպել։
