ԵՐԵՎԱՆ, 28 ապրիլի — Sputnik. Ադրբեջանին ձեռնտու է, որ Հայաստանի ներքաղաքական ճգնաժամը լինի տևական, և նա դժվար թե Ացախում ռազմական արկածախնդրության գնա։ Այս մասին այսօր լրագրողներին ասաց Եվրասիական ինտեգրացման և համերկրացիների հետ կապերի գործերով հանձնաժողովի նախագահի առաջին տեղակալ, ԱՊՀ երկրների ինստիտուտի ղեկավար, ՌԴ Անվտանգության խորհրդին կից գիտխորհրդի անդամ Կոնստանտին Զատուլինը` մեկնաբանելով շփման գծում իրավիճակի սրացման հնարավորությունը։
Զատուլինը նշեց, որ անձամբ իր համար մտահոգիչ էր 2016 թվականի քառօրյա ապրիլյան պատերազմը։
Խորհրդարանականի խոսքով` նա գիտի, որ հենց Ադրբեջանական կողմը, հենց Ալիևն է «ներքին և արտաքին» պատճառներով որոշել հակամարտության գոտում էսկալացիայի դիմել։
Զատուլինն ափսոսում է, որ հայկական դիրքերի վրա ռուսական զենքից են կրակել` հույս հայտնելով, որ հետագայում ռուսական զենքի մատակարարումը Հայաստանին վերականգնել է երկու երկրների ռազմական հավասարակշռությունը։ Նա ևս մեկ անգամ ընդգծլ է, որ Ռուսաստանը դեմ է Արցախի հակամարտության ռազմական լուծմանը։
«Մեր ներկայությունն այստեղ, Պուտինի ու նախագահ Սարգսյանի հետ անցկացրած հեռախոսազրույցը վկայում են, որ դժվար պահին Ռուսաստանը Հայաստանից չի հեռանում», — ասաց Զատուլինը։
Նրա խոսքով`դա պետք է հայտնի լինի ոչ միայն Հայաստանում, այլև Ադրբեջանում։ Այդ պատճառով նա չի կարծում, թե Ադրբեջանը կփորձի օգտագործել Հայաստանի ներքաղաքական խնդիրները։
«Կարծում եմ` Ադրբեջանը հույս ունի, որ ներքաղաքական խնդիրները շարունակվելու են։ Իսկ եթե փորձի որևէ բան նախաձեռնել, ապա մեծ հավանականությամբ Հայաստանում կհամախմբվեն։ Ինչո՞ւ է դա պետք Ադրբեջանին», — ասաց Զատուլինը։
Նրա կարծիքով` պաշտոնական Բաքուն «լուռ ուրախանում է» Հայաստանի ներքին խնդիրներից։
Ամեն դեպքում սադրանքները Արցախում, հատկապես երբ Հայաստանն այդքան բարդ ժամանակներ է ապրում, անընդունելի է։
Հիշեցնենք` այս օրերին Երևանում են գտնվում Պետդումայի ԱՊՀ հարցերով հանձնաժողովի նախագահ Լեոնիդ Կալաշնիկովը, նրա տեղակալ Կոնստանտին Զատուլինը, ՌԴ Դաշնային ժողովի անդամ, Հայաստանի ազգային հերոս Նիկոլայ Ռիժկովը և այլ խորհրդարանականներ։ Ուրբաթ նրանք հանդիպել են ԱԺ խոսնակ Արա Բաբլոյանի հետ` պատրաստակամություն հայտնելով ստեղծված իրավիճակը քննարկել նաև խմբակցությունների ղեկավարների հետ։
