ԵՐԵՎԱՆ, 28 ապրիլի — Sputnik. Հայաստանում ստեղծված իրավիճակում արտաքին միջամտություն չկա։ Այս մասին այսօր տեղի ունեցած ասուլիսին հայտարարել է արդարադատության նախարարի պաշտոնակատար Դավիթ Հարությունյանը։
«Սա բացառապես ներքաղաքական իրավիճակ է, դրսից դերակատարների ներգրավումը ուղղված է երկրում ստեղծված իրավիճակը կարգավորելուն»,- ասել է Հարությունյանը։
Նա նաև նշել է, որ հայաստանյան ճգնաժամը քննարկվում է Ռուսաստանում և այլ երկրներում, այդ թվում` Եվրամիությունում։ Ցանկացած հանդիպում, անգամ նախապես ծրագրված հանդիպումներն ավարտվում են երկրում ստեղծված իրավիճակի մասին քննարկումներով։
«Մենք Ռուսաստանի ողմից ճնշում չենք զգում իրավիճակը հստակ որևէ ձևով հանգուցալուծելու համար։ Բայց մենք ճնշում, ներազդեցություն ենք զգում բոլոր կողմերից, որոնք կոչ են անում հարցը խաղաղ և քաղաքական ճանապարհով լուծել»,- նշեց նախարարի պաշտոնակատարը։
Նրա խոսքով` բոլոր երկրների կարծիքը համընկնում է այն հարցում, որ իրավիճակը պետք է որոշվի խաղաղ, քաղաքական ճանապարհով։
Հարությունյանը նաև հայտնել է, որ Հայաստանում տեղի ունեցող գործընթացները պետք չէ դիտարկել որպես իշխանությունը զավթելու միջոց, քանի որ դա քաղաքական գործընթաց է։
«Դա քաղաքացիների կողմից իրենց դժգոհութունը, բողոքը հայտնելու միջոց է։ Այդ ամենը կարգավորվում է օրենքով»,- ընդգծել է Դավիթ Հարությունյանը։
Հիշեցնենք` Երևանում 10 օր տևած բողոքի ակցիաներից հետո երեկ` ապրիլի 23-ին, ՀՀ վարչապետ Սերժ Սարգսյանը հրաժարական տվեց։ Օրեր շարունակ տասնյակ հազարավոր մարդիկ ցույցերի էին դուրս եկել` բողոքելով Սերժ Սարգսյանի իշխանության երկարացման դեմ (2008 թվականից նա ղեկավարում էր երկիրը որպես նախագահ, իսկ ապրիլի 17-ին խորհրդարանն ընտրել էր նրան որպես վարչապետ ու պետության փաստացի ղեկավար)։
ՀՀ վարչապետ Սերժ Սարգսյանի հրաժարականից հետո ՀՀ նախագահ Արմեն Սարգսյանն ընդունեց նաև կառավարության հրաժարականը։ Այս պահին կառավարության ղեկավարի պարտականություններն իրականացնում է Կարեն Կարապետյանը։ Նախարարները շարունակում են աշխատել ժամանակավոր պաշտոնակատարների կարգավիճակով։ Նոր վարչապետի ընտրություններն ԱԺ-ում նախատեսվում են հաջորդ շաբաթ։
