ԵՐԵՎԱՆ, 27 ապրիլի — Sputnik. Վերջին օրերին Երևանի փակված փողոցների պատճառով մարդիկ չեն կարողացել ժամանակին հասնել «Զվարթնոց» օդանավակայան, և ինքնաթիռն օդ է բարձրացել առանց նրանց։
Նրանցից մեկն էլ Արմանն էր (անունը փոխված է), որը պատրաստվում էր մեկնել ԱՄՆ։
«Ես պետք է ԱՄՆ թռչեի, 1200 դոլարով տոմս էի գնել, բայց մնացի օդանավակայանի ճանապարհին։ Չէի կարող ո՛չ հետ գնալ, ո՛չ մեկնել օդանավակայան»,-Sputnik Արմենիայի թղթակցին ասաց տղամարդը` չզսպելով արցունքները։
Արմանն այդպես էլ չի կարողացել հասնել ԱՄՆ-ում բնակվող հարազատների մոտ։ Իրավիճակից ցնցված` նա գլխիկոր նստել է ճանապարհի անկյունում։
Այն, որ ցույցերի պատճառով մի քանի հոգի ուշացել են չվերթերից, հաստատեցին նաև Քաղացիական ավիացիայի գլխավոր վարչությունում։
«Մի քանի դեպքեր են եղել, երբ ուղևորներն ուշացել են չվերթից», — Sputnik Արմենիայի թղթակցի հետ զրույցում ասաց ՔԱԳՎ մամուլի քարտուղար Սաթենիկ Հովհաննիսյանը։
Երևանի «Զվարթնոց» միջազգային օդանավակայանի ճանապարհը մի քանի օր շարունակ պարբերաբար փակում էին ցուցարարները։
Երևանում 10 օր տևած բողոքի ակցիաներից հետո ապրիլի 23-ին ՀՀ վարչապետ Սերժ Սարգսյանը հրաժարական տվեց։ Օրեր շարունակ տասնյակ հազարավոր մարդիկ ցույցերի էին դուրս եկել` բողոքելով Սերժ Սարգսյանի իշխանության երկարացման դեմ (2008 թվականից նա ղեկավարում էր երկիրը որպես նախագահ, իսկ ապրիլի 17-ին խորհրդարանն ընտրել էր նրան որպես վարչապետ ու պետության փաստացի ղեկավար)։
ՀՀ վարչապետ Սերժ Սարգսյանի հրաժարականից հետո ՀՀ նախագահ Արմեն Սարգսյանն ընդունեց նաև կառավարության հրաժարականը։ Այս պահին կառավարության ղեկավարի պարտականություններն իրականացնում է Կարեն Կարապետյանը։
