ԵՐԵՎԱՆ, 27 ապրիլի — Sputnik. ՌԴ Դաշնային ժողովի անդամ, Հայաստանի ազգային հերոս Նիկոլայ Ռիժկովի հույս ունի, որ Հայաստանի քաղաքական ուժերը կառուցողական երկխոսություն կսկսեն։ Այս մասին նշվում է սենատորի հատուկ հայտարարության մեջ։
«Ռուսաստանին ու Հայաստանին միավորում է դարավոր բարեկամությունը։ Երկու երկրների եղբայրական ժողովուրդները միասին են և՛ ուրախության, և՛ տխրության պահին։ Հենց այդ պատճառով մենք անտարբեր չենք հայ ժողովրդի ճակատագրի նկատմամբ, հենց այդ պատճառով եմ այսօր Հայաստանում գտնվում», – նշվում է հաղորդագրության մեջ։
Ռիժկովի խոսքով` Հայաստանն այս պահին բարդ շրջան է ապրում։ Ռուսաստանը, լինելով Երևանի ամենամտերիմ գործընկերներից մեկը, ուշադիր հետևում է տեղի ունեցող գործընթացներին։
Քաղաքական գործիչը համոզված է, որ դարերի ընթացքում կուտակած ազգային իմաստությունը կնպաստի, որ երկրի կյանքը հնարավորինս շուտ ընկնի հունի մեջ։
«Հույս ունենք, որ իրավիճակը կզարգանա իրավական դաշտում, բոլոր քաղաքական ուժերը պատասխանատու կգտնվեն ու կառուցողական երկխոսություն սկսելու պատրաստակամություն կհայտնեն», – ընդգծել է Ռիժկովը։
Հիշեցնենք, որ Երևանում 10 օր տևած բողոքի ակցիաներից հետո, որը կազմակերպել էր «Իմ քայլը» նախաձեռնությունը, ապրիլի 23-ին ՀՀ վարչապետ Սերժ Սարգսյանը հրաժարական տվեց։ Օրեր շարունակ տասնյակ հազարավոր մարդիկ ցույցերի էին դուրս եկել` բողոքելով Սերժ Սարգսյանի իշխանության երկարացման դեմ (2008 թվականից նա ղեկավարում էր երկիրը, որպես նախագահ, իսկ ապրիլի 17-ին խորհրդարանն ընտրել էր նրան որպես վարչապետ ու պետության փաստացի ղեկավար)։
ՀՀ վարչապետ Սերժ Սարգսյանի հրաժարականից հետո ՀՀ նախագահ Արմեն Սարգսյանն ընդունեց նաև կառավարության հրաժարականը։
Դրանից հետո «Իմ քայլը» նախաձեռնությունը` ղեկավար Նիկոլ Փաշինյանի գլխավորությամբ, շարունակում է պայքարել իշխող ՀՀԿ–ի դեմ, որպեսզի նրանք վարչապետի պաշտոնում առաջ չմղեն իրենց թեկնածուին։
