ԵՐԵՎԱՆ, 27 ապրիլի — Sputnik. Երբ հայտարարվում է, որ օրակարգը սա է, և մյուս կողմն իրավունք չունի որևիցե օրակարգ ձևավորել, դա արդեն բանակցություն չէ։ «Շանթ» հեռուստաընկերությանը տված հարցազրույցում ՀՀ վարչապետի պաշտոնակատար Կարեն Կարապետյանն այսպես է մեկնաբանել ընդդիմության բանակցությունների հրավերը մերժելու որոշումը։
Կարապետյանը չի բացառել, որ Հայաստանի քաղաքացիներն ուզում են ՀՀ վարչապետ տեսնել Նիկոլ Փաշինյանին, բայց և չի բացառել, որ դա այդպես չէ։
Նա առաջարկել է Ազգային Ժողով գալ ծրագրով, ստանալ անհրաժեշտ քվեն և դառնալ վարչապետ: «Բայց մոնոպոլիզացնել՝ ասել, ես եմ միայն վարչապետը, այլ թեկնածու չկա, բանակցությունների ժամանակ ես եմ օրակարգը թելադրում, դու օրակարգի իրավունք չունես, չեմ կարծում, որ մենք ցանկացել ենք այդպիսի հասարակություն ձևավորել»,– ասել է Կարապետյանը։
Նա նաև չի հերքել, որ Հայաստանում կա ճգնաժամ, կուտակված խնդիրներ։ Բայց և նշել է, որ ստեղծված իրավիճակում պետք է ընտրել, թե որ ուժը, կամ որ ուժերի համախմբումն է տանելու երկիրը դեպի ավելի լավ ապագա:
«Մենք անձ պետք է չընտրենք, մենք ծրագիր, մենք թիմ պետք է ընտրենք, մենք պետք է մեկս մյուսին լսելու ունակություն ունենանք, մենք պետք է հանդուրժողական լինենք: Մենք չենք թաքցնում, որ ունենք մեր մեղավորության բաժինը, գուցե և շատ մեծ, որ այս անհանդուրժողական մթնոլորտը կա, այսքան կուտակված սոցիալական խնդիրներ կան, բայց մենք այդ վիճակից պետք է դուրս գանք, չգիտեմ, մեկս մյուսի հետ խոսելով, ընդունելով սխալները, լսելով մյուս կարծիքները»,– ասել է Կարապետյանը։
Հիշեցնենք, որ այսօր ժամը 12։00–ին Նիկոլ Փաշինյանը հանդիպման ու բանակցությունների էր հրավիրել Կարեն Կարապետյանին։ Վերջինը, սակայն մերժել էր` հրաժարվելով բանակցել լրագրողների ներկայությամբ։
Ավելի վաղ Կարեն Կարապետյանը մերժել էր նաև ապրիլի 25-ի բանակցությունների առաջարկը` պատճառաբանելով, որ ընդդիմությունը միակողմանի պայմաններ է թելադրում` ընտրելով բանակցությունների ձևաչափը։
Մայիսի 1-ին ԱԺ–ում հատուկ նիստ է նշանակված, որի ժամանակ խորհրդարանը կընտրի ՀՀ ապագա վարչապետին։
