ԵՐԵՎԱՆ, 25 ապրիլի — Sputnik. ՌԴ պաշտոնական ներկայացուցիչը «Իմ քայլը» շարժման առաջնորդ Նիկոլ Փաշինյանին հավաստիացրել է, որ Ռուսաստանը Հայաստանի ներքին գործերին չի միջամտում։ Այս մասին Երևանի Հանրապետության հրապարակում հայտարարեց «Իմ քայլը» նախաձեռնության առաջնորդ Նիկոլ Փաշինյանը։
Նա անդրադարձավ տարածվող լուրերին, թե Կարեն Կարապետյանը «Ռուսաստանի մարդն է» և որ Ռուսաստանն աջակցում է նրան ՀՀ վարչապետ դառնալու հարցում։
«Ես այսօր հանդիպել եմ Ռուսաստանի պաշտոնական ներկայացուցչի հետ, և նա նորից վերահաստատել է Ռուսաստանի պաշտոնական տեսակետն այն մասին, որ Ռուսաստանը Հայաստանի ներքին գործերին չի միջամտում»,-ասաց Փաշինյանը։
Հիշեցնենք` մինչ այդ Փաշինյանը հայտարարել էր, որ այսօր հանդիպելու է Հայաստանում ՌԴ և ԱՄՆ դեսպանների հետ։
Երևանում 10 օր տևած բողոքի ակցիաներից հետո ապրիլի 23-ին ՀՀ վարչապետ Սերժ Սարգսյանը հրաժարական տվեց։ Օրեր շարունակ տասնյակ հազարավոր մարդիկ ցույցերի էին դուրս եկել` բողոքելով Սերժ Սարգսյանի իշխանության երկարացման դեմ (2008 թվականից նա ղեկավարում էր երկիրը որպես նախագահ, իսկ ապրիլի 17-ին խորհրդարանն ընտրել էր նրան որպես վարչապետ ու պետության փաստացի ղեկավար)։
ՀՀ վարչապետ Սերժ Սարգսյանի հրաժարականից հետո ՀՀ նախագահ Արմեն Սարգսյանն ընդունեց նաև կառավարության հրաժարականը։ Այս պահին կառավարության ղեկավարի պարտականություններն իրականացնում է Կարեն Կարապետյանը։ Նախարարները շարունակում են աշխատել ժամանակավոր պաշտոնակատարների կարգավիճակով։
