ԵՐԵՎԱՆ, 25 ապրիլի — Sputnik. Որոշ գործարարներ մայրաքաղաքի փողոցներում ծավալվող բողոքի ակցիաների ու երթերի պատճառով գերադասում են չբացել իրենց օբյեկտների դռները, մյուսները` մեծաթիվ բազմությունից սովորականից ավելի շատ եկամուտներ են ստանում։
Իշխանությունը վստահեցնում է, որ առկա ներքաղաքական իրավիճակն ազդում է տնտեսության վրա, անգամ զբոսաշրջիկներն են վախենում գալ Հայաստան։
Տնտեսագետ Ատոմ Մարգարյանը այս օրերին տեղի ունեցող դեպքերի հետ կապված հայաստանյան տնտեսության համար լուրջ վտանգներ չի տեսնում։
Sputnik Արմենիայի հետ զրույցում Մարգարյանը չհերքեց, որ հատկապես Փաշինյան-Կարապետյան բանակցությունների չեղարկումից հետո անորոշությունն ու ռիսկերն հանրության շրջանում ավելացել են։ Եվ, այդուհանդերձ, երկրի տնտեսության ու ֆինանսական կայունության վրա այս պահի դրությամբ բացասական ազդեցություն չի արձանագրվել։ Հակառակը` Ատոմ Մարգարյանը նշում է, որ որոշ ներդրողներ Հայաստանի հետ նոր ծրագրեր են փորձում իրականացնել։
«Օրինակ երեկ «Տաշիր» ընկերությունների խմբի սեփականատեր Սամվել Կարապետյանը հանդիպեց վարչապետի պաշտոնակատարի հետ և հավաստիացրեց, որ իրենք շարունակելու են իրենց ծրագրերը ամբողջական ծավալով»,- ասաց Մարգարյանը` հավելելով, որ այլ ներդրողներ ևս մինչև օրս Հայաստանում իրենց բիզնեսի համար անհանգստություն չեն հայտնել։
Բացի այդ, Հայաստանի տնտեսությունն այն մաքուր շուկայական տնտեսությունը չէ, որի պարագայում բորսաները շատ արագ կարձագանքեին տեղի ունեցող իրադարձություններին։
Մինչդեռ ՀՀ վարչապետի պաշտոնակատար Կարեն Կարապետյանն այսօր լրագրողների հետ հանդիպմանը հայտարարեց, որ ապակայուն վիճակը չի կարող օգուտ տալ երկրին։ Նա հայտնեց, որ մշտապես ձեռքը պահում է զարկերակի վրա և տեսնում, թե ինչպես են նվազում զբոսաշրջության ծավալները ու գործարարների հետաքրքրությունը Հայաստանի նկատմամբ։
