ԵՐԵՎԱՆ, 24 ապրիլի — Sputnik. «Պատրաստ ենք բոլորի հետ խոսել, համագործակցել, որպեսզի իշխանության խաղաղ հանձնումը կայանա։ Այս մասին այսօր օտարերկրյա լրագրողների հետ հանդիպման ընթացքում ասաց «Ելք » դաշինքի և «Իմ քայլը» նախաձեռնության ղեկավար Նիկոլ Փաշինյանը։
«Բոլոր այն ուժերը, որոնք պատրաստ են օգնել այդ հարցում, մենք պատրաստ ենք բոլորի հետ խոսել, բանակցել։ Ժողովրդի հաղթանակը տրամաբանական ավարտին կմոտենա։ Հեղափոխության, ժողովրդի թեկնածուն պետք է դառնա ՀՀ վարչապետ։ Դա միակ ճանապարհն է նորմալ կյանք վերադառնալու համար»,–ասաց Փաշինյանը։
Նրա խոսքով` դեմոկրատիան հնարավորություն է ոչ միայն կառավարություն ընտրելու, այլ բարելավելու այդ կառավարության վիճակը։ «Ոչ ոք այստեղ հիմա ընտրությունների արդյունքին չի հավատում, որովհետև անկախությունից ի վեր այս երկրում բոլոր ընտրությունները կեղծվել են»,–ասաց պատգամավորը։
«Իսկ ի՞նչ եք անելու, որ դա փոխվի, մարդիկ հավատան» հարցին ի պատասխան Փաշինյանն ասաց. «Մենք արդեն արել ենք, հեղափոխությունը և Սերժ Սարգսյանի հրաժարականը իրողություն են»։
Կարեն Կարապետյանի` հնարավոր վարչապետ դառնալու վերաբերյալ հարցին Փաշինյանը միանգամից կտրուկ ասաց` ոչ։ «Մինչև ընտրությունները պետք է փոխենք ընտրական օրենսգիրքը, որ ապահովենք նորմալ ընտրական գործընթաց»,–նշեց նա։
Հիշեցնենք` Երևանում 10 օր տևած բողոքի ակցիաներից հետո երեկ` ապրիլի 23-ին, ՀՀ վարչապետ Սերժ Սարգսյանը հրաժարական տվեց։ Օրեր շարունակ տասնյակ հազարավոր մարդիկ ցույցերի էին դուրս եկել` բողոքելով Սերժ Սարգսյանի իշխանության երկարացման դեմ (2008 թվականից նա ղեկավարում էր երկիրը որպես նախագահ, իսկ ապրիլի 17-ին խորհրդարանն ընտրել էր նրան որպես վարչապետ ու պետության փաստացի ղեկավար)։
ՀՀ վարչապետ Սերժ Սարգսյանի հրաժարականից հետո ՀՀ նախագահ Արմեն Սարգսյանն ընդունեց նաև կառավարության հրաժարականը։ Այս պահին կառավարության ղեկավարի պարտականություններն իրականացնում է Կարեն Կարապետյանը։ Նախարարները շարունակում են աշխատել ժամանակավոր պաշտոնակատարների կարգավիճակով։ Նոր վարչապետի ընտրություններն ԱԺ-ում նախատեսվում են հաջորդ շաբաթ։
