ԵՐԵՎԱՆ, 24 ապրիլի – Sputnik. Վարչապետի ժամանակավոր պաշտոնակատար Կարեն Կարապետյանի և «Իմ քայլը» ընդդիմադիր շարժման առաջնորդ Նիկոլ Փաշինյանի` վաղը «Մարիոթ» հյուրանոցում նախատեսված հանդիպումը և բանակցությունները չեղյալ են հայտարարվել:
Այս մասին Sputnik Արմենիայի թղթակցին տեղեկացրել է «Քաղաքացիական պայմանագիր» կուսակցության մամուլի խոսնակ Տիգրան Ավինյանը:
«Բանակցությունները կարող են տեղի ունենալ միայն այն կետերի շուրջ, որոնք նախապես հայտարարվել են մեր կողմից։ Դա էր իշխանության խաղաղ փոխանցման օրակարգը` ԱԺ արտահերթ ընտրությունները: ՀՀԿ-ի ներկայացուցիչը չի կարող լինել ժամանակավոր կառավարության առաջին դեմքը: Միայն այս օրակարգի շուրջ կարող են լինել բանակցություններ: Որևէ այլ օրակարգ քննարկելի չէ մեզ համար»,- ասաց Ավինյանը:
Հիշեցնենք, որ վարչապետի ժամանակավոր պաշտոնակատարի և Նիկոլ Փաշինյանի հանդիպումը նախատեսված էր վաղը` ապրիլի 25–ին, ժամը 11։00–ին «Մարիոթ» հյուրանոցում։ Անգամ հայտարարվել էր, որ այն տեղի է ունենալու առանց լրագրողների ներկայության։ Լրագրողներին նախատեսված էր միայն հանդիպման վերջում հարցեր տալու հնարավորություն ընձեռել։
