ԵՐԵՎԱՆ, 24 ապրիլի — Sputnik. Լիբերալ դեմոկրատական կուսակցության նախագահ Վլադիմիր Ժիրինովսկին երազում է նստել Մոսկվայից Երևան ընթացող արագընթաց գնացք: Այս մասին հայտնում է ՌԻԱ Նովոստին:
«Ես կուզեի Երևան-Մոսկվա գնացք նստել, որը կանցներ Թբիլիսիով: Պատկերացնում եք՝ արագընթաց գնացք, Մոսկվայից Երևան հասնենք ընդամենը 20 ժամում», — ասել է Ժիրինովսկին Սուվորովի արձանի մոտ կայացած հայ համայնքի «Հիշում եմ և պահանջում» հավաքույթին՝ նվիրված Օսմանյան Թուրքիայում հայերի Ցեղասպանությանը:
Ժիրինովսկին առաջարկել է աշխատեցնել Մոսկվա-Երևան երկաթուղիները: Ակցիայի մասնակիցներն այդ ժամանակ սկսել են տարբերակներ առաջարկել, մեկը հնչեցրել է մետրոյի տարբերակը:
«Մետրո՞: Եկեք մետրո կառուցենք: Երևան-Մոսկվա մետրո: Մեր գիտնականները կարող են անել դա: Ռուսներն ու հայերը միշտ միասին են», — ասել է Ժիրինովսկին:
