ԵՐԵՎԱՆ, 23 ապրիլի — Sputnik. Նիկոլ Փաշինյանը գտնվում է Երևանի ՁՊՎ–ում(Ձերբակալվածների պահման վայր)։ Այս մասին «Ելք» խմբակցության անդամ Լենա Նազարյանը տեղեկացնում է իր ֆեյսբուքյան տեսաուղերձում։
Նա նաև որոշ մանրամասներ է հայտնում այսօր առավոտյան ԱԺ նախագահ Արա Բաբլոյանի հետ «Ելք» խմբակցության անդամների հանդիպումից։
«Արա Բաբլոյանն առաջարկում էր նստել բանակցային սեղանի շուրջ` իրավիճակին լուծում տալու համար։ ԱԺ նախագահը պայման է դրել, որպեսզի այդ ընթացքում դադարեցվեն փողոցային երթերն ու հանրահավաքները»,– ասաց Լենա Նազարյանը` հավելելով, որ իրենք չեն ընդունել այդ նախապայմանը` ասելով, որ որևէ մեկն իրենցից ցույցերը դադարեցնելու կոչ չի անի։
Ինչ վերաբերում է իրենց խմբակցության 3 անդամներին անձեռնմխելիությունից զրկելուն, Լենա Նազարյանի փոխանցմամբ ինքն ԱԺ նախագահին զգուշացրել է, որ այդ որոշումը խայտառակություն կլինի երկրի համար։
Ի դեպ, այդ հարցով այսօր, ժամը 14։00–ին նախանշված արտահերթ նիստն այս պահին հետաձգվել է անորոշ ժամանակով։
