ԵՐԵՎԱՆ, 23 ապրիլի — Sputnik. Այն պահից, երբ իմ խուց սկսեցին այցելել ՀՀ բարձրաստիճան պաշտոնյաներ, ես հասկացա, որ թավշյա հեղափոխությունը հաղթել է։ Այսօր Հանրապետության հրապարակում հանրահավաքի ժամանակ, անդրադառնալով իր ձերբակալությանն ու մեկուսացմանը, պատմեց «Իմ քայլը» նախաձեռնության առաջնորդ, ԱԺ պատգամավոր Նիկոլ փաշինյանը։
«Ինձ առաջարկում էին, որ Սերժ Սարգսյանը հրաժարական տա հոկտեմբերին, հետո առաջարկեցին, որ նա հրաժարական տա 2 ամսից, ավելի ուշ առաջարկիեցին, որ հրաժարական տա ապրիլի 25-ին։ Ես ասացի` նա պետք է հրաժարական տա 2 ժամվա ընթացում, և Սերժ Սարգսյանը 2 ժամվա ընթացքում հրաժարական տվեց»,- ասաց Փաշինյանը։
Անդրադառնալով երեկ` ապրիլի 22-ին առավոտյան «Մարիոթ» հյուրանոցում Սերժ Սարգսյանի հետ հանդիպմանը` Նիկոլ Փաշինյանն ասաց, որ այդ պահից իսկ հասկանալի էր, որ նա հրաժարական է տալու։
«Նա հանդիպման կեսից թողեց հեռացավ։ Այդ պահից ինձ համար հասկանալի էր, որ նա հեռացել է նաև վարչապետի պաշտոնից»,- ասաց Փաշինյանը։
«Երբ երեկ ԱԱԾ մի խումբ աշխատակիցներ ինձ առևանգեցին ու հույժ գաղտնի պայմաններում տարան Սևանի ոստիկանության բաժին, նրանք չէին հասկանում, թե ինչու եմ ես իրենց հետ կատակներ անում։ Ես նրանց ասում էի`դուք չեք հասկանում` Սերժ Սարգսյանի իշխանությունն այլևս չկա, կա նոր իշխանություն, որի անունն է Հայաստանի Հանրապետության ժողովրդի իշխանություն»,- ասաց Փաշինյանը։
Նիկոլ Փաշինյանն իր ելույթում ՀՀ իշխանություններից պահանջեց այսօր անհապաղ ազատ արձակել վերջին օրերի հանրահավաքներից բերման ենթարկած ու ձերբակալված բոլոր անձանց։
«Հայաստանում չպիտի լինեն քաղաքական բանտարկյալներ»,- ասաց նա` հավելելով, որ Հայաստանի բոլոր քաղբանտարկյալները պետք է ազատ արձակվեն։
Ավարտելով ելույթը` Նիկոլ Փաշինյանը հրապարակում հավաքված ՀՀ բազմահազար քաղաքացիներին կոչ արեց վաղը` ապրիլի 24-ին, Ծիծեռնակաբերդի հուշահամալիր այցելել Հանրապետության հրապարակից ժամը 15։00 մեկնարկող քայլերթով։
«Այս հաղթանակով մենք մեր մեծագույն տուրքն ենք մատուցել Հայոց ցեղասպանության բոլոր զոհերին, և հայ ժողովուրդը ցույց տվեց, որ ցեղասպանությունը իր համար անցյալ է, հայ ժողովուրդն այլևս երբեք չի պարտվելու, որովհետև մենք հաղթած ժողովուրդ ենք»,- ասաց Փաշինյանը։
Ապրիլի 24-ին Փաշինյանը կոչ արեց բոլոր գործողությունները տեղավորել օրվա խորհրդի համատեքստում։
