ԵՐԵՎԱՆ, 22 ապրիլի — Sputnik. Անօրինական հավաքներին և զանգվածային անկարգություններին մասնակցելու կասկածանքով ձերբակալվել են ևս 24 անձ: Հայտնում է Հատուկ քննչական ծառայությունը:
Քրեական գործի նյութերով, նշված անձինք, ապրիլի 13-ից մասնակցելով անօրինական հավաքներին ու երթերին, արգելափակել են պետական մարմինների շենքերի մուտքերը, ներխուժել հատուկ պահպանության ենթակա շենքերի տարածքներ` տևական ժամանակով խախտելով դրանց բնականոն աշխատանքն ու վտանգելով հասարակական անվտանգությունը:
Բացի այդ, նրանք պարբերաբար փակել են մի շարք պողոտաներ և փողոցներ, խոչընդոտել պետական և այլ կառույցների բնականոն գործունեությանը, կազմակերպել զանգվածային անկարգություններ և մասնակցել դրանց` բռնություն կիրառելով ոստիկանության ծառայողների ու այլ անձանց նկատմամբ:
«Նշված զանգվածային անկարգությունների հետևանքով տասնյակ անձինք ստացել են ֆիզիկական և գույքային վնասներ, վտանգվել է հասարակական անվտանգությունը»,- ասված է ՀՔԾ տարածած հաղորդագրության մեջ:
Ըստ ՀՔԾ-ի՝ 24 ձերբակալվածների թվում են նաև ԱԺ պատգամավորներ Նիկոլ Փաշինյանը, Սասուն Միքայելյանը, Արարատ Միրզոյանը, հավաքների կազմակերպիչներից Տիգրան Մազմանյանը, Արմեն Գրիգորյանը, Դավիթ Սանասարյանը: Իսկ Գոռ Միրզոյանը, Էրիկ Խաչատրյանը, Հայկարամ Մնացականյանը և Գևորգ Մանուկյանը ձերբակալվել են անօրինական հավաքներին ակտիվորեն մասնակցելու և զանգվածային անկարգությունների ընթացքում բռնություն գործադրելու կասկածանքով:
Ձերբակալվածներից երեքը՝ Տիգրան Մազմանյանը, Գոռ Միրզոյանն ու Էրիկ Խաչատրյանը արդեն մեղադրյալի, իսկ մնացածը` դեռևս կասկածյալի կարգավիճակում են: Մազմանյանի և Միրզոյանի նկատմամբ որպես խափանման միջոց է կիրառվել կալանավորումը, իսկ Է. Խաչատրյանն ազատ է արձակվել՝ հսկողության տակ մնալու պայմանով՝ հաշվի առնելով նրա՝ անչափահաս լինելու հանգամանքը:
Նախաքննությունը շարունակվում է: ՀՔԾ-ն տեղեկացնում է, որ միջոցներ են ձեռք առնվում անկարգությունների այլ մասնակիցներին հայտնաբերելու համար:
