ԵՐԵՎԱՆ, 20 ապրիլի — Sputnik. Մարդու իրավունքների պաշտպանի աշխատակազմը բողոքներ ու ահազանգեր է ստանում ծնողներից, որոնց մտահոգում է իրենց երեխաների անվտանգությունն ու կրթական պրոցեսների խաթարումը: Այս մասին հայտնում են ՀՀ ՄԻՊ գրասենյակից։
Քաղաքացիները հայտնել են, որ ստեղծված իրավիճակում նախընտրում են երեխաներին դպրոց չտանել:
Մարդու իրավունքների պաշտպանին են դիմում նաև դպրոցների տնօրեններն ու ուսուցիչները` հայտնելով, որ տարբեր անձինք շրջում են դպրոցներով, պահանջում են ապահովել իրենց մուտքը դպրոցներ՝ դասերին մասնակցող երեխաներին հավաքներին ու երթերին ներգրավելու նպատակով:
Ինչպես հայտնում են ՄԻՊ գրասենյակից, ուսուցիչներից մեկը տեղեկացրել է, որ դպրոց այցելած անձինք այդ պահին բակում գտնվող երեխաներին փորձել են տանել իրենց հետ:
ՄԻՊ-ը հայտնում է նաև, որ որոշ դպրոցներում երեխաների անվտանգությունն ապահովելու համար ոստիկանները փակում են դպրոցի դռները, ինչի արդյունքում խոչընդոտներ են ստեղծվում ծնողների համար, քանի որ նրանց թույլ չեն տալիս մտնել դպրոց ու տուն տանել երեխաներին։
«Ոստիկանության ծառայողներն առանց մանկավարժի կամ հոգեբանի մասնակցության կամ ներկայության հարցման են ենթարկել երեխաներին՝ հավաքներին մասնակցելու հարցում նպաստողների կամ հրահրողների վերաբերյալ»,- հայտնում է ՄԻՊ գրասենյակը:
Դպրոցներ ինքնակամ մուտք գործելով ու առանց ծնողների տեղեկացվածության և համաձայնության` երեխաներին հավաքներին մասնակցելու կոչեր անելը, Մարդու իրավունքների պաշտպանի համոզմամբ, խաղաղ հավաքներին երեխաների մասնակցության իրավունքի իրացում չէ։
