ԵՐԵՎԱՆ, 20 ապրիլի — Sputnik. Ծառայողական պարտականությունները կատարող ոստիկանների նկատմամբ բռնություն կիրառելու համար ձերբակալել են երկու քաղաքացու։ Այս մասին հայտնում է ՀՀ քննչական կոմիտեի մամուլի ծառայությունը։
2018թ. ապրիլի 18-ին՝ ժամը 12.30-ի սահմաններում, Երևան քաղաքի Աբովյան փողոցի թիվ 34 հասցեի մոտ ոստիկանները փորձել են բերման ենթարկել քաղաքացիներին։
Ինչպես հայտնում է Քննչական կոմիտեն, մի քանի հոգի հարձակվել և բռնություն են գործադրել իրենց ծառայողական պարտականությունները կատարող ոստիկանների նկատմամբ՝ ոտքերով և ձեռքերով հարվածներ հասցնելով նրանց մարմնի տարբեր մասերին։ Հարուցված քրեական գործի շրջանակում պարզվել է քաղաքացիներից 2-ի ինքնությունը, ովքեր ձերբակալվել են։
Բռնության ենթարկված ոստիկանները, պաշտոնական տվյալներով, ՀՀ ոստիկանության Երևանի վարչության քրեական հետախուզության բաժնի աշխատակիցներ են:
Նշենք, որ ապրիլի 17-ին Ազգային ժողովում անցկացված քվեարկության արդյունքում ՀՀ վարչապետ ընտրվեց Սերժ Սարգսյանը։ «Ելք» խմբակցության ղեկավար Նիկոլ Փաշինյան ու նրա կողմնակիցները դուրս են եկել Երևանի փողոցներ և բողոքում են այս ընտրության դեմ։
Փաշինյանը մարտի 31-ից Հայաստանի տարածքում նախաձեռնել է «Իմ քայլը» արշավը։ Մի քանի օրում Փաշինյանն իր համախոհների հետ ոտքով անցել է ավելի քան 200 կիլոմետր` ակցիաներ անցկացնելով Գյումրիում, Վանաձորում, Սպիտակում, Դիլիջանում, Աբովյանում և Հրազդանում։ Պատգամավորն ու նրա համախոհները բողոքում էին վարչապետի պաշտոնում Սերժ Սարգսյանի թեկնածության առաջադրման դեմ, սակայն նրանց բողոքը չխանգարեց, որ Ազգային ժողովը վարչապետ ընտրի հենց Սարգսյանին։
Երևանում քաղաքացիական անհնազանդության գործողությունները մեկնարկել են ապրիլի 16-ից։ Փաշինյանը հայտարարել է, որ թավշյա հեղափոխություն է իրականացնում։
