ԵՐԵՎԱՆ, 19 ապրիլի — Sputnik. ՀՀ ԱԺ պատգամավոր, «Իմ քայլը» շարժման առաջնորդ Նիկոլ Փաշինյանը դեռ չի շտապում վերադառնալ խորհրդարան ու մասնակցել նիստերին։
«Ամեն ինչն իր ժամանակն ունի, կիմանաք», — հինգշաբթի ասաց նա լրագրողներին` պատասխանելով հարցին, թե ինչ է մտադիր անել հետագայում, կվերադառնա՞ արդյոք խորհրդարան, թե՞ կշարունակի պայքարը փողոցում։
Փաշինյանը չխոսեց նաև երկարատև հեռանկարի մասին`հայտնելով միայն, որ շարժման նպատակն ինստիտուցիոնալ ընդդիմության ձևավորումն է։
Ինչպես դեպքի վայրից հայտնում է Sputnik Արմենիայի թղթակիցը, Փաշինյանն ու նրա համախոհները ներկա պահին գտնվում են քաղաքապետարանի մոտ գտնվող այգում, նրանք մի փոքր դադար են վերցրել։
Ընդդիմադիրը կարևորեց նաև իր թիմի աշխատանքը։
«Ո՞վ է համակարգում շարժումը, երբ ես ամբողջ օրը ոտքի վրա եմ։ Իհարկե, ընկերներս։ Առանց իմ թիմի ես ոչ մի բան եմ», — ասաց նա։
Ապրիլի 17-ին Ազգային ժողովում անցկացված քվեարկության արդյունքում ՀՀ վարչապետ ընտրվեց Սերժ Սարգսյանը։ «Ելք» խմբակցության ղեկավար Նիկոլ Փաշինյան ու նրա կողմնակիցները դուրս են եկել Երևանի փողոցներ և բողոքում են այս ընտրության դեմ։
Փաշինյանը մարտի 31-ից Հայաստանի տարածքում նախաձեռնել է «Իմ քայլը» արշավը։ Մի քանի օրում Փաշինյանն իր համախոհների հետ ոտքով անցել է ավելի քան 200 կիլոմետր` ակցիաներ անցկացնելով Գյումրիում, Վանաձորում, Սպիտակում, Դիլիջանում, Աբովյանում և Հրազդանում։ Պատգամավորն ու նրա համախոհները բողոքում էին վարչապետի պաշտոնում Սերժ Սարգսյանի թեկնածության առաջադրման դեմ, սակայն նրանց բողոքը չխանգարեց, որ Ազգային ժողովը վարչապետ ընտրի հենց Սարգսյանին։
Երևանում քաղաքացիական անհնազանդության գործողությունները մեկնարկել են ապրիլի 16-ից։
