ԵՐԵՎԱՆ, 19 ապրիլի — Sputnik. Հայաստանում ստեղծված իրավիճակից միակ ելքը քաղաքական երկխոսությունն է, մերժողականությունը ճանապարհ չէ։ Այսօր ՀՀԿ ԳՄ նիստի ավարտին, պատասխանելով լրագրողների հարցերին, ասաց ՀՀԿ խոսնակ, ՀՀ ԱԺ փոխնախագահ Էդուարդ Շարմազանովը։
Նա նաև տեղեկացրեց, որ նիստի ընթացքում իշխող Հանրապետական կուսակցությունը քննարկել է Հայաստանում ստեղծված իրավիճակն ու դրա հնարավոր հանգուցալուծումը։
«Մենք Հայաստանում թշնամիներ չունենք, բոլորը մեր եղբայրներն ու քույրերն են»,- ասաց Շարմազանովը` հավելելով, որ Նիկոլ փաշինյանն էլ իրենց եղբայրն է` անկախ նրանից, թե նա իրենց եղբայր համարում է, թե ոչ։
«Մենք կարծում ենք, որ բոլոր խնդիրները պետք է լուծվեն ժողովրդավարական չափանիշներով, օրենքի և Սահմանադրության գերակայությունից ելնելով», — ասաց Շարմազանովը` համոզմունք հայտնելով, որ իշխանությունը պարտավոր է դրսևորել հանդուրժողականություն և զսպվածություն։
«Մենք հարգում ենք մեր քաղացիների ազատ երթերի, հանրահավաքներ իրականացնելու իրավունքը։ Սա սահմանադրական նորմ է, և որևէ մեկն իրավունք չունի սահմանափակել այդ իրավունքը։ Բայց կազմակերպիչները պարտավոր են ուշադրություն դարձնել երթի օրինական ընթացքին, որպեսզի մասնակիցներից որևէ մեկը չիրականացնի ապօրինի գործողություններ»,- ասաց նա` ընդգծելով, որ օրենքի խախտումներ այս օրերին, այնուամենայնիվ, եղել են։
Իսկ իրավապահների աշխատանքը ՀՀԿ խոսնակը դրական է գնահատում, պահվածքը` զուսպ և պրոֆեսիոնալ։
