ԵՐԵՎԱՆ, 18 ապրիլի — Sputnik. Թուրքիայում արտահերթ նախագահական և խորհրդարանական ընտրությունները տեղի կունենան 2018թ–ի հունիսին։ Այդ մասին հայտարարել է երկրի նախագահ Ռեջեփ Թայիփ Էրդողանը, հաղորդում է Anadolu գործակալությունը։
«Թուրքիայի ազգայնական շարժում կուսակցության ղեկավար Դևլեթ Բախչելիի հետ բանակցությունների ընթացքում մենք քննարկել ենք արտահերթ նախագահական և խորհրդարանական ընտրություններ անցկացնելու առաջարկը», – ասել է Էրդողանը։
Նրա խոսքով` այսօրվանից Թուրքիայում կսկսվի ընտրություններին նախապատրաստվելու իրավաբանական գործընթաց։
«Թուրքիայի գերագույն ընտրական հանձնաժողովն անհապաղ ձեռնամուխ է եղել նախապատրաստությանը», – ասել է Էրդողանը։
2017թ–ի ապրիլին երկրում տեղի է ունեցել սահմանադրական հանրաքվե, որը զգալիորեն ընդլայնել է նախագահի լիազորությունները։ Սահմանադրական փոփոխություններն ուժի մեջ կմտնեն նախագահի գալիք ընտրություններից հետո։
