ԵՐԵՎԱՆ, 18 ապրիլի — Sputnik. «Իմ քայլը» նախաձեռնության կազմակերպիչ, ԱԺ «Ելք» խմբակցության ղեկավար Նիկոլ Փաշինյանը քիչ առաջ հեռացավ հանրահավաքից։ Մինչ այդ նա բարձրախոսով հայտարարեց, որ 1-1,5 ժամով հեռանում է կուսակցության գրասենյակ` երեկոյան հանրահավաքին ընդառաջ խորհրդակցություն անցկացնելու։
Մինչ հեռանալը նա հավաքի պատասխանատու նշանակեց նախաձեռնության անդամ, ակտիվիստ Շահեն Հարությունյանին։
Փաշինյանն ակցիայի մասնակիցներին կոչ արեց իր բացակայության ընթացքում շարունակել շրջափակման մեջ պահել նախարարությունների շենքերը։
«Նախարարությունների դռները պատշաճ ձևով շրջապատված պետք է լինեն»,- ասաց նա։
Փաշինյանը հավաքի մասնակիցներին կոչ արեց որևէ գույք չվնասել, հարգալից լինել ոստիկանների նկատմամբ և թույլ չտալ, որ դիմակավորված անձինք հայտնվեն իրենց շարքերում ու մասնակցեն հավաքին։
Հիշեցնենք, որ Փաշինյանի նախաձեռնած ակցիայի մասնակիցներն ավելի շուտ շրջափակել էին նաև Երևանի քաղաքապետարանի շենքը, որտեղ շուրջ 1 ժամ մնալուց հետո երթով հասան Վազգեն Սարգսյան փողոցում տեղակայված կառավարության մասնաշենք։ Այս շենքում են տեղակայված Կրթության և գիտության, արդարադատության, արտաքին գործերի, սփյուռքի նախարարությունները։
Երեկ` ապրիլի 17-ին, Ազգային ժողովում անցկացված քվեարկության արդյունքում ՀՀ վարչապետ ընտրվեց Սերժ Սարգսյանը։ «Ելք» խմբակցության ղեկավար Նիկոլ Փաշինյան ու նրա կողմնակիցները դուրս են եկել Երևանի փողոցներ և բողոքում են այս ընտրության դեմ։
Փաշինյանը մարտի 31-ից Հայաստանի տարածքում նախաձեռնել է «Իմ քայլը» արշավը։ Մի քանի օրում Փաշինյանն իր համախոհների հետ ոտքով անցել է ավելի քան 200 կիլոմետր` ակցիաներ անցկացնելով Գյումրիում, Վանաձորում, Սպիտակում, Դիլիջանում, Աբովյանում և Հրազդանում։ Պատգամավորն ու նրա համախոհները բողոքում էին վարչապետի պաշտոնում Սերժ Սարգսյանի թեկնածության առաջադրման դեմ, սակայն նրանց բողոքը չխանգարեց, որ Ազգային ժողովը վարչապետ ընտրի հենց Սարգսյանին։
Երևանում քաղաքացիական անհնազանդության գործողությունները մեկնարկել են ապրիլի 16-ից։
