ԵՐԵՎԱՆ, 18 ապրիլի — Sputnik. Մոսկվայի «Արարատի» նախկին մարզիչ, ներկայում Վլադիվոստոկի «Լուչ–Էներգիայի» գլխավոր մարզիչ Ալեքսանդր Գրիգորյանը հայտարարել է, որ դիմել է իրավապահ մարմիններին, այդ թվում` Անվտանգության դաշնային ծառայությանը։
Հիշեցնենք, որ Ռուսաստանի Ֆուտբոլի ազգային լիգայի առաջնության 33–րդ փուլի ժամանակ Վլադիվոստոկի ակումբի երկրպագուներից մեկը կենդանի աքաղաղ է նետել Գրիգորյանի վրա։ «Լուչ–Էներգիայի» մարզչին չի հաջողվում ձեռք բերել սեփական թիմի երկրպագուների վստահությունն այն բանից հետո, երբ նա մի անգամ լքել է այն։
«Ինչո՞ւ, որովհետև իմ համբերությունը սպառվել է, ես դիմել եմ իրավապահ մարմիններին, այդ թվում` ԱԴԾ։ Ես կներկայացնեմ նյութեր և փաստեր։ Երկար եմ համբերել և համարել, որ իմ կողմից, հավանաբար, տղամարդկային արարք չի լինի ոստիկանություն դիմելը։ Հիմա ես հասկանում եմ, որ այդ անձինք ոտնձգություն են կատարել ֆուտբոլի հանդեպ իմ սիրո նկատմամբ», – ասել է նա Sport24 կայքին։
Գրիգորյանի խոսքով` նա միշտ շնորհակալ է իսկական երկրպագուներին աջակցության համար, բայց «այդ անձինք ոչ մի ընդհանուր բան չունեն նրանց հետ»։
«Մեղադրել ինձ նրանում, որ ես աշխատե՞լ եմ Խաբարովսկում։ Ես հպարտ եմ, որ աշխատել եմ այնտեղ։ Ես չեմ ամաչում ոչ մի աշխատանքի համար, ինչ էլ որ ասեն։ Վերջին 12 տարիների ընթացքում իմ օրոք «Լուչ–Էներգիան» ցուցադրել է լավագույն արդյունքը։ Ես նախկինի նման հիմնվում եմ միայն փաստերի վրա», – ասել է մարզիչը։
Սեփական թիմի երկրպագուների հետ Գրիգորյանի հակամարտությունը ծագել է 2014թ–ին, երբ նա որոշել է լքել «Լուչը», որը տվյալ պահին ֆինանսական դժվարություններ է կրել։
