ԵՐԵՎԱՆ, 18 ապրիլի – Sputnik. ՀՀ նախագահ Արմեն Սարգսյանը վարչապետ Սերժ Սարգսյանի առաջարկով մի շարք հրամանագրեր է ստորագրել, որոնցով ՀՀ նախկին վարչապետ Կարեն Կարապետյանին նշանակել է առաջին փոխվարչապետ, Արմեն Գևորգյանին ու Վաչե Գաբրիելյանին` փոխվարչապետներ: Այս մասին նշված է ՀՀ նախագահի պաշտոնական կայքում։
Միաժամանակ Արմեն Գևորգյանն ազատվել է ՀՀ նախագահի աշխատակազմի ղեկավարի պաշտոնից։ Նրան այդ պաշտոնում կփոխարինի նախագահի աշխատակազմի ղեկավարի տեղակալ Վարդան Մակարյանը` առայժմ աշխատակազմի ղեկավարի ժամանակավոր պաշտոնակատարի կարգավիճակում։
Հիշեցնենք, երեկ ՀՀ վարչապետ ընտրված ու նախագահի հրամանով այդ պաշտոնում նշանակված Սերժ Սարգսյանն Ազգային ժողովում հայտարարեց, որ նոր կառավարությունը շատ արագ կձևավորվի։
Կարեն Կարապետյանը ծնվել է 1963թ. օգոստոսի 14-ին Ստեփանակերտում: 1970-1980թթ. սովորել և ավարտել է Երևանի Լ. Տոլստոյի անվան միջնակարգ դպրոցը: 1980-1985թթ. սովորել և գերազանցության դիպլոմով ավարտել է Երևանի պետական համալսարանի կիրառական մաթեմատիկայի ֆակուլտետը: 1989թ. ստացել է տնտեսագիտության թեկնածուի գիտական աստիճան: 2010թ. ստացել է տնտեսագիտության դոկտորի գիտական աստիճան, ունի 32 գիտական աշխատանք:
1985-1996թթ. աշխատել է ՀՀ պետպլանի հաշվողական կենտրոնում, գիտության և մշակույթի գործիչների ասոցիացիայում: Միաժամանակ դասավանդել է ԵՊՀ-ում: 1996-1998թթ. աշխատել է «Հայէներգո» ՊՁ-ում որպես գլխավոր տնօրենի տեղակալ: 1998-2001թթ. աշխատել է «Հայէներգո» ՓԲԸ-ում որպես գլխավոր տնօրեն: 2001թ. նշանակվել է ՀՀ էներգետիկայի նախարարի տեղակալ: 2001-2010 թթ. եղել է «ՀայՌուսգազարդ» ՓԲԸ-ի վարչության նախագահ-գլխավոր տնօրենը: 2009թ. ՀՀԿ համամասնական ցուցակով ընտրվել է Երևան քաղաքի ավագանու անդամ: 2010-2011թթ-ին եղել է Երևանի քաղաքապետը, 2011-2016 թթ-ին` «Գազպրոմբանկ» ԲԲԸ առաջին փոխնախագահը, 2013 թվականից` «ԱՌԷԿՍԻՄԲԱՆԿ-ԳԱԶՊՐՈՄԲԱՆԿԻ ԽՈՒՄԲ» Խորհրդի անդամ: Հայաստանի վարչապետ էր նշանակվել 2016 թվականի սեպտեմբերի 13-ին, հրաժարականի դիմում է ներկայացրել այս տարվա ապրիլի 9-ին։
