ԵՐԵՎԱՆ, 18 ապրիլի — Sputnik. Ազգային ժողովի պատգամավոր Նիկոլ Փաշինյանի նախաձեռնած հավաքների մասնակիցներից ավելի քան վեց տասնյակին բերման են ենթարկվել։ Այս մասին հայտնում է ՀՀ ոստիկանությունը։
Ապրիլի 18-ի, ժամը 12:00-ի դրությամբ ոստիկանության տարբեր բաժանմունքներում 66 բերման ենթարկված կա։
Այսօր առավոտյան 10։ 00-ին հավաքի մասնակիցներն ու ԱԺ ընդդիմադիր պատգամավորները հավաքվել էին Երևանի Ֆրանսիայի հրապարակում, որտեղից երթով հասան Բաղրամյան 26` ՀՀ նախագահի նախկին նստավայր, որտեղ այժմ գտնվում ՀՀ վարչապետ Սերժ Սարգսյանի նստավայրը։ Այստեղից երթը դարձյալ վերադարձավ Ֆրանսիայի հրապարակ, Մաշտոցի Պողոտա, Կորյուն, Չարենց Ալեք Մանուկյան փողոցներ։
Հընթացս Նիկոլ Փաշինյանը Երևանի պետական և Մանկավարժական համալսարանների, Ֆիզիկական կուլտուրայի ինստիտուտի ուսանողներին կոչ արեց դասադուլ անել ու միանալ հավաքին։
ԱԺ «Ելք» խմբակցության պատգամավոր Նիկոլ Փաշինյանը մարտի 31-ից Հայաստանի տարածքում նախաձեռնել է «Իմ քայլը» արշավը։ Մի քանի օրում Փաշինյանն իր համախոհների հետ ոտքով անցել է ավելի քան 200 կիլոմետր` ակցիաներ անցկացնելով Գյումրիում, Վանաձորում, Սպիտակում, Դիլիջանում, Աբովյանում և Հրազդանում։ Պատգամավորն ու նրա համախոհները բողոքում էին վարչապետի պաշտոնում Սերժ Սարգսյանի թեկնածության առաջադրման դեմ, սակայն նրանց բողոքը չխանգարեց, որ Ազգային ժողովը երեկ` ապրիլի 17-ին, վարչապետ ընտրի հենց Սարգսյանին։
Երևանում քաղաքացիական անհնազանդության գործողությունները մեկնարկել են ապրիլի 16-ից։
Նշենք, որ երեկ «Իմ քայլը» շարժման նախաձեռնող, «Ելք» խմբակցության ղեկավար Նիկոլ Փաշինյանը ցուցարարներին հորդորեց գնալ տուն և գիշերը չմնալ փողոցում։ Նա նշեց, որ «թավշյա հեղափոխություն է» սկսում և հորդորեց հատուկ կոմիտեներ ստեղծել բոլոր մարզերում։