ԵՐԵՎԱՆ, 16 ապրիլի — Sputnik. Ղարաբաղը փոքր երկիր է, սակայն դա հիմք չէ ասելու, որ այն չունի ազատ ապրելու իրավունք: Այստեղ մարդիկ հազարավոր տարիներ ապրել են և կշարունակեն ապրել: Ռուսական «Իզվեստիա» թերթին տված հարցազրույցում ասել է ՀՀ նախկին նախագահ Սերժ Սարգսյանը:
Անդրադառնալով ԵԱՀԿ ՄԽ համանախագահների միջնորդությամբ խաղաղ կարգավորման գործընթացին` Սարգսյանը հիշեցրել է, որ 2011 թվականին Կազանում, երբ կողմերը մոտ էին կարգավորման փաստաթղթի ստորագրմանը, Բաքուն առաջ քաշեց լրացուցիչ պահանջներ` խափանելով ստորագրումը։
«2016 թվականի ապրիլին, տանուլ տալով բանակցություններում, ադրբեջանական կողմը, դավադիր կերպով խախտելով համաձայնագրով իր բոլոր պարտականությունները, լայնամասշտաբ ագրեսիա սկսեց ԼՂՀ-ի դեմ՝ մեծ քանակությամբ օդուժի, զրահատեխնիկայի, խոշոր տրամաչափի հրետանիների, հրթիռային և հրետանային համակարգերի կիրառմամբ, որոնց մեծ մասն, ի դեպ, ձեռք է բերվել Ռուսաստանից: Սակայն նրանց չհաջողվեց լուծել որևէ լուրջ խնդիր, և հինգերորդ օրը Ռուսաստանի միջնորդությամբ կողմերը հանդիպեցին և պայմանավորվեցին վերսկսել ավելի վաղ ստորագրված համաձայնագրի պայմանների կատարումը»,- ասել է Սարգսյանը:
Նա շեշտել է, որ Ղարաբաղի ապագան ազատ կյանքն է: Բոլոր միջնորդները խոսում են 3 սկզբունքների մասին և կարգավորումը հնարավոր է միայն դրանց սկզբունքների հիման վրա, որոնք անտարանջատելի են:
