ԵՐԵՎԱՆ, 15 ապրիլի — Sputnik. Իտալացի դերասանուհի Կլաուդիա Կարդինալեն, որը ֆրանսիահայ ռեժիսոր Անրի Վերնոյի լեգենդար «Մայրիկ» ֆիլմում մոր դերն է կատարել, այսօր դառնում է 80 տարեկան։
Թունիսի ամենագեղեցիկ իտալուհին՝ Կլաուդիա Կարդինալեն (իսկական անունը՝ Կլոդ Ժոզեֆին Ռոզ Կարդինալե) ծնվել է 1938 թվականին։ Առաջին անգամ Կլաուդիան նկարահանվել է 14 տարեկանում, Թունիսի մասին ֆիլմի մի դրվագում։
1957 թվականին Կարդինալեն ճանաչվել է Թունիսի ամենագեղեցիկ իտալուհին, իսկ որպես նվեր Վենետիկի կինոփառատոնի հրավեր է ստացել։ Այնտեղ աղջկան նկատել է երիտասարդ պրոդյուսեր Ֆրանկո Կրիստալդին, որի հետ նա ամուսնացել է 1966 թվականին։ Սակայն 1975 թվականին նրանք ամուսնալուծվել են։
Կարդինալեն նկարահանվել է իտալացի այնպիսի հայտնի ռեժիսորներին ֆիլմերում, ինչպիսին են Լուկիոն Վիսկոնտին ու Ֆեդերիկոն Ֆելինին։ Նա նկարահանվել է այնպիսի կինոաստղերի հետ, ինչպիսինն են՝ Ալեն Դելոնը, Մարչելո Մաստրոյանին և այլն։
1991 թվականին ֆրանսահայ ռեժիսոր Անրի Վերնոյից (Աշոտ Մալաքյան) նա հրավեր է ստանում Հայոց ցեղասպանության մասին «Մայրիկ» ֆիլմում գլխավոր դեր կատարելու։ Կլաուդիայի գործընկերը դառնում է եգիպտացի դերասան Օմար Շարիֆը։
2010 թվականին «Ոսկե ծիրան» կինոփառատոնի շրջանակում Կարդինալեն Հայաստան է եկել։ Փառատոնը նվիրված էր Ցեղասպանության 95-րդ տարելիցին ու Վերնոյի 90-ամյակին։
Հայ լրագրողների հետ զրույցում Կլաուդիան խոստովանել է, որ «Մայրիկ» ֆիլմում նկարահանվելուց հետո երազում էր Հայաստան գալ։
«Հայոց ցեղասպանության մասին գիտեի դեռ մինչև «Մայրիկ» ֆիլմում աշխատանքը սկսելը։ Սակայն նկարահանումներին պատրաստվելիս, ընթերցելով` փորձեցի ավելի շատ բան իմանալ հայ ժողովրդի այդ սարսափելի ողբերգության մասին», —խոստովանել է Կարդինալեն։
Դերը կերտելիս` նա զգացել է կոտորածի սարսափները, գաղթի ու օտար հողում ապրելու բարդությունները տեսած հայուհու ապրումները։
«Հուսով էի, որ մի օր այս ֆիլմով Արարատի մոտ կգամ», — նշել է Կարդինալեն։
Իր մասին դերասանուհին ասել է, որ 100 կյանք է ունեցել, այսինքն՝ այնքան, որքան կերպար է նրան հաջողվել է մարմնավորել էկրանին։
