ԵՐԵՎԱՆ, 14 ապրիլի — Sputnik. Ամերիկայի Միացյալ Նահանգները, Մեծ Բրիտանիան և Ֆրանսիան Սիրիայի օբյեկտների ուղղությամբ արձակել են ավելի քան 100 թևավոր և «օդ-երկիր» դասի հրթիռ։ Այս մասին հայտարարել է ՌԴ պաշտպանության նախարարությունը։
Սիրիայի հակաօդային պաշտպանության համակարգը հակաօդային պայքար է մղել, հրթիռների զգալի մասը ոչնչացվել է թիրախներին հասնելու ընթացքում։
Очевидцам атаки США против Сирии удалось сфотографировать момент нанесения ракетных ударов. pic.twitter.com/iD0ezK3iuo
— Мировые РИА Новости (@RIA_Worldnews) 14 апреля 2018 г.
Նշվում է, որ հարվածները հասցվել են ԱՄՆ-ի ռազմածովային ուժերի 2 նավից՝ Կարմիր ծովի կողմից, Միջերկրական ծովի օդային տարածքում գտնվող մարտավարական ավիացիայից, ինչպես նաև ամերիկյան ռազմավարական B-1B ռմբակոծիչներից։
Ավելի վաղ ԱՄՆ նախագահ Դոնալդ Թրամփը դիմել էր ժողովրդին` հայտարարելով, որ Սիրիայի ուղղությամբ հարվածներ են լինելու։ Ավելի ուշ հարվածներ հասցնելու փաստը հաստատել է Մեծ Բրիտանիայի վարչապետ Թերեզա Մեյը, ինչպես նաև Ելիսեյան պալատը։
ՌԴ ՊՆ-ն հայտնել է, որ ապրիլի 14-ին՝ ռուսական ժամանակով ժամը 3.42-ից մինչև 5.10-ը, ԱՄՆ ԶՈՒ օդանավերն ու նավերը Ֆրանսիայի ու Մեծ Բրիտանիայի հետ համատեղ հրթիռային հարվածներ են հասցրել Սիրիայի ռազմական ու քաղաքացիական օբյեկտներին։
ՄԱԿ-ում Ռուսաստանի մշտական ներկայացուցիչ Վասիլի Նեբենզյան իր հերթին կոչ էր արել ԱՄՆ-ին ռազմական արկածախնդրության չգնալ Սիրիայում։
