ԵՐԵՎԱՆ, 10 ապրիլի — Sputnik. Նոր համաձայնագրով ձևավորվում է Հայաստան-ԵՄ հարաբերությունները ղեկավարող և համակարգող ինստիտուցիոնալ մարմին` գործընկերության խորհուրդ, որը բարձրագույն քաղաքական մարմինն է՝ բաղկացած կողմերի նախարարական մակարդակով ներկայացուցիչներից: Այսօր ԱԺ-ում Հայաստան-ԵՄ համապարփակ և ընդլայնված գործընկերության մասին համաձայնագիրը վավերացնելու հարցի քննարկման ժամանակ հայտնեց ՀՀ փոխարտգործնախարար Կարեն Նազարյանը:
«Այս մարմինը վերահսկելու է համաձայնագրի կիրարկման գործընթացը»,- ասաց նա:
Նա նաև նշեց, որ համաձայնագիրը համակարգում է քաղաքական, տնտեսական, առևտրային երկկողմ հարաբերությունները` հիմնված հավասար գործընկերության և սերտ հարաբերությունների վրա:
«Առանձնակի և հստակ անդրադարձ կա ԼՂ հակամարտության խաղաղ ու համապարփակ կարգավորման հարցին: Կարևոր է, որ համաձայնագիրը վերահաստատում է ԵՄ հանձնառությունը` աջակցելու ԵԱՀԿ ՄԽ համանախագահների կողմից ԼՂ հակամարտության լուծման մոտեցումներն ու ջանքերը` հիմնված միջազգային իրավունքի նորմերի ու սկզբունքների, մասնավորապես` ուժի և ուժի սպառնալիքի չկիրառման, տարածքային ամբողջականության ու ինքնորոշման վրա»,- ասաց փոխնախարարը:
Համաձայնագրի գործակցությամբ, նրա խոսքով, կողմերը վերահաստատում են նաև ազատ շուկայական հարաբերությունների իրենց հանձնառությունը: Արտաքին անվտանգության ոլորտում կարևորվում է անվտանգության ձևաչափերում Հայաստանի մասնակցությունը:
Փաստաթուղթն անդրադառնում է նաև անդրսահմանային հանցագործությունների դեմ պայքարի, մուտքի արտոնագրերի տրամադրման, տրանսպորտի, էներգետիկայի շրջակա միջավայրի, կլիմայի փոփոխության, տեղեկատվական հասարակական ոլորտում համագործակցության, սպառողների պաշտպանության, զբաղվածության, սոցիալական քաղաքականության և հավասար հնարավորությունների, պետական գնումների, ֆինանսական աջակցության, խարդախության դեմ պայքարի և այն ոլորտային հարցերի:
«Համաձայնագրի համապարփակ և ուժեղացված և հավասարակշռված առևտրի դրույթները կօգնեն ՀՀ տնտեսությանը հաջողությամբ ինտեգրվել համաշխարհային տնտեսության մեջ»-ասաց Նազարյանը:
Նշենք, որ ԵՄ-ի հետ նոր համաձայնագիրը փոխարինելու է 1999թ-ից գործող գործակցության համաձայնագրին, որի գործողության ժամկետը սպառվել է դեռ 2009թ-ին և ամեն տարի երկարացվում է 1 տարի ժամկետով:
Հայաստան-ԵՄ համապարփակ և ընդլայնված գործընկերության մասին համաձայնագիրը նախատեսում է ընդլայնել համագործակցությունը տնտեսական, իրավական, կրթական, մարդասիրական և այլ ոլորտներում։ Դրա հետ մեկտեղ այն կազմվել է այնպես, որպեսզի չհակասի Հայաստանի եվրասիական ինտեգրման շրջանակներում իրականացվող գործընթացներին։
ԵՄ-Հայաստան համաձայնագիրը ստորագրվեց նոյեմբերի 24-ին Բրյուսելի «Արևելյան գործընկերության» գագաթնաժողովին։
