Մինչև այս` 2013 թ.-ի սեպտեմբերի 27-ից, նա զբաղեցում էր Մեծ Բրիտանիայի և Հյուսիսային Իռլանդիայի Թագավորությունում ՀՀ արտակարգ և լիազոր դեսպանի պաշտոնը։ Այս տարվա ապրիլի 5-ին նա ավարտեց իր դիվանագիտական առաքելությունը` Հայաստան վերադառնալու և նախագահի պաշտոնը ստանձնելու համար։
Բարձրաստիճան պաշտոնատար անձանց էթիկայի հանձնաժողովում ներկայացված է Արմեն Սարգսյանի գույքի և եկամուտների հայտարարագիրը` 2013 թվականից սկսած, երբ նա նոր էր դեսպան նշանակվել։
Ներկայացված տարեկան հայտարարագրերից տեղեկանում ենք, որ 2013 թվականին դեսպանի պաշտոնում նշանակվելու օրվանից Արմեն Սարգսյանը որպես անշարժ գույք է հայտարարագրել 3 անհատական բնակելի տուն` հողամասով առանձնատուն և 2 բնակարան։ Նրա դրամական միջոցներն այդ օրվա դրությամբ կազմել են 8 միլիոն եվրո։
2014 թվականին Արմեն Սարգսյանն, ըստ հայտարարգրի, ձեռք է բերել Range Rover 4.4 L V8 մակնիշի ավտոմենքենա՝ 70․000 ֆունտ ստեռլինգ արժողութամբ (մոտ 47 միլիոն դրամ): Հարկային տարվա վերջին նրա դրամական միջոցները կազմել են 7 միլիոն 600 հազար եվրո։
2015 թվականին նրա դրամական միջոցները նվազել են՝ կազմելով 6 միլիոն 150 հազար եվրո։ Ուրիշ նոր գույք հայտարարագրված չէ։
2016 թվականին նորանշանակ նախագահի ֆինանսական կարողությունը կազմել է 5 միլիոն 700 հազար եվրո։
Արմեն Սարգսյանի կինը՝ Նունե Սարգսյանը, որի գույքն ու կարողությունը նույնպես հայտարարագրված են, 2013 թվականի տարեսկզբին 950 հազար եվրո դրամական միջոց է ներկայացրել, իսկ տարեվերջին՝ 930 հազար եվրո։
Ըստ տարեկան հայտարարագրերի` նրա դրամական միջոցներն աստիճանաբար նվազել են։ 2014 թվականին նա 900 հազար եվրո է հայտարարագրել, 2015-ին՝ 850 հազար եվրո, 2016-ին` 780 հազար եվրո։
Նախորդ և այս տարիների համար Բարձրաստիճան պաշտոնատար անձանց էթիկայի հանձնաժողովում նոր տվյալներ դեռևս հրապարակված չեն։
