ԵՐԵՎԱՆ, 6 ապրիլի — Sputnik. Հայաստանում շարունակվում է կարմրուկի, կապույտ հազի հաղթարշավը. գրանցվեց կարմրուկով 15-րդ հիվանդը, կապույտ հազի 31-րդը։ Այս մասին հայտնում է ՀՀ առողջապահության նախարարության իմունականխարգելման ազգային ծրագրի ղեկավար Գայանե Սահակյանը` նշելով, որ հիվանդները պատվաստված չեն եղել։
«Կանխատեսվում է, որ այս շքերթին կմիանան նաև խոզուկի վիրուսը, դիֆթերիայի բակտերիան ու պապիլոմավիրուսն էլ կողքից կուրախանա: Բա հո մենակ չէ՞ր մնալու: Սարսափելի կլինի, եթե այս հաղթարշավը եզրափակեն հենց դիֆթերիան ու պոլիոմիելիտը…Վերջապես կհիշենք 1994 թվականի Հայաստանն ու 2010-ի Տաջիկստանը: Հետևանքներն իրոք սարսափելի կլինեն: Ժողովուրդ ջան վա՞տ էր, մամաներ ջան, գո՞հ չէիք, որ ապրում էիք մոռացած այս հիվանդությունները, վա՞տ էր որ երեխաների առողջությունը վտանգված չէր, վա՞տ էր, որ նույն ձևով քաղցկեղի մի տեսակ հնարավոր էր վերացնել»,- ֆեյսբուքյան իր էջում գրել է Սահակյանը:
Նա վստահեցնում է, որ չակերտավոր հանրային առողջության մասնագետները (անալիտիկ-վերլուծաբան, գրող-հրապարակախոս, մաթեմատիկ-հանրային առողջության մասնագետ ձևացող, փաստաբան, ֆինանսիստ-բանկիստ, լրագրող, պատգամավոր, վայ բժիշկ) շահարկեցին մի ոլորտ, որը կայացել էր մեր երկրում։
«Դարձել էիք իմունիզացիայի կարկառուն դեմքեր: Բա ու՞ր եք, դուրս ելեք վիրուսների ու բակտերիանետի դեմ կռիվ տվեք: Ինչու՞: Ինչու՞ քաղաքականացրիք, ինչու՞ խեղճ ժողովրդին մոլորեցրիք… Տխուր է, շատ տխուր…..10 տարի պահանջվեց, որ քայլ առ քայլ առաջ գնանք, բայց շատ կարճ ժամանակում՝ մեծ լոնքերով հետ գնացինք…դեպի անգրագիտություն»,- գրել է նա:
