ԵՐԵՎԱՆ, 3 ապրիլի — Sputnik. Զբոսաշրջիկները կարող են հանգիստ լինել. Հայաստանի իշխանությունը հետևում է գազաբալոնների անվտանգությանը։ Այս մասին Sputnik Արմենիայի թղթակցի հետ զրույցում ասաց Հայաստանի զբոսաշրջության կոմիտեի փոխնախագահ Մեխակ Ապրեսյանը։
Երեկ Երևանի կենտրոնում «Բուրգեր Քինգ» արագ սննդի կետում պայթյուն է տեղի ունեցել։ Ըստ նախնական տվյալների՝ ռեստորանի խոհանոցում պայթել է գարեջրի ճնշումն ապահովող թթվածնի բալոնը: Տուժել են ութ մարդ, այդ թվում` Ռուսաստանի ու Իրանի քաղաքացիներ։ Նրանք առանց զբոսաշրջային փաթեթների եկած միայնակ ճամփորդող զբոսաշրջիկներ էին։ Այդ պատճառով նրանք ուղևորության մեջ մտնող բժշկական ապահովագրություն չունեին։
«Փառք աստծուն, ոչ ոք չի մահացել։ Իսկ տուժածներին շուտափույթ ապաքինում ենք մաղթում։ Ով էլ տուժի` զբոսաշրջիկ, թե տեղացի, մեզ շատ է անհանգստացնում։ Իհարկե, ցանկացած երկրում կարող է այդպիսի բան պատահել։ Շատ կարևոր է, որ բժիշկներն ու ԱԻՆ-ը ժամանակին են արձագանքել։ Հուսով եմ` մեր երկրի հեղինակությունը չի տուժի։ Իսկ պատասխանատու մարմինները շարունակում են ստուգումները այդ օբյեկտում ու պլանային կանխարգելիչ ստուգումները ուրիշ օբյեկտներում», —նշեց Ապրեսյանը։
Միաժամանակ նա ավելացրեց` պետք է նշել, որ Հայաստանի ռեստորանների ու հյուրանոցների համար սա բացառիկ դեպք է։ Այնպես որ հանգստացողների ընդունելության հետ անհամատեղելի լուրջ վտանգի մասին խոսք չկա։
Հիշեցնենք, որ երեկ Հյուսիսային պողոտայի թիվ 5 հասցեում գտնվող «Բուրգեր Քինգ» արագ սննդի կետի խոհանոցում տեղի է ունեցել ածխաթթու գազի 20 կգ-անոց բալոնի պայթյուն: Պայթյունի հետևանքով տուժել են 8 մարդ՝ Ռուդոլֆ Մարկոսյան (2012 թ.), Ռուբինա Մարկոսյան (2010 թ.), Զարուհի Մելիքյան (1999 թ.), Էրիկ Աշուղյան (2002 թ., ԻԻՀ քաղաքացի), Ալյոնա Ագապովա (2003 թ., ՌԴ քաղաքացի), Լիզա Աբրամովա (2004 թ., ՌԴ քաղաքացի), Յարոսլավ Լյուբենկո (2003 թ., ՌԴ քաղաքացի), Զեյնաբ Հուսեինի (1994 թ., ԻԻՀ քաղաքացի): Նրանց տեղափոխել են «Գրիգոր Լուսավորիչ» բժշկական կենտրոն։
Ավելի ուշ Իրանի երկու քաղաքացիներին դուրս են գրել հիվանդանոցից։
