ԵՐԵՎԱՆ, 3 ապրիլի — Sputnik. Հայաստանում ջերմաստիճանի նվազումից հետո եղանակը կտաքանա, և անձրևներ կտեղան։ Այս մասին այսօր լրագրողներին ասաց ՀՀ ԱԻՆ Հիդրոօդերևութաբանության և մթնոլորտային երևույթների վրա ակտիվ ներգործության ծառայության տնօրենի տեղակալ Լևոն Ազիզյանը։
Ապրիլ-հունիս ժամանակահատվածում օդի ջերմաստիճանը նորմայի սահմաններում կլինի, իսկ տեղումները` նորմայից բարձր։
Մի քանի օրից Հայաստանը կներթափանցեն տաք օդային հոսանքները, և հորդառատ անձրև կտեղա, բայց դեռ պետք է սպասել, որ ցրտերն անցնեն։ Այդ ընթացքում բույսերը պետք է ավելի առատ ջրել։
Ջրային տնտեսության պետական կոմիտեն խոստանում է օգնել այս հարցում։ Պետկոմիտեի ղեկավարի տեղակալ Վոլոդյա Նարիմանյանը հայտնեց, որ հիմա արդեն կարելի է լրացուցիչ ոռոգման հայտեր ներկայացնել։
Իսկ հետո` ապրիլ-հունիսին, տեղումները նորմայից շատ կլինեն։ Ճիշտ է` ջրամբարներում մինչև հիմա ջրի պակաս կա։ Աշնանն ու ձմռանը տեղումները քիչ են եղել։ Իսկ քանի որ ձմեռը տաք էր (նորմայից 3-8 աստիճան տաք), ապա ջուրն ավելի շատ է գոլորշիացել։ Այդ պատճառով էլ խոշոր ջրամբարներից երեքը մեկ երրորդով կամ ավելի քիչ են լցված, ևս երկուսը` 55-60%-ով։
Ընդհանուր առմամբ 2018 թվականի վերջին Սևանի մակարդակը պետք է լինի 1900 մետր 42-47 սանտիմետր, այսինքն ջրի մակարդակը լճում կավելանա մոտ 5 սանտիմետրով` հաշվի առնելով, որ ամռանը ոռոգման նպատակով Սևանից ջուր վերցնելու կարիք կլինի։
Հավելյալ ջուր չվերցնելու համար որոշվել է արտեզյան նոր հորեր բացել, թեև վերջին տարիներին հանրապետության ստորգետնյա ջրերի պաշարները խիստ նվազել են։
Բայց Նարիմանյանը պարզաբանեց, որ այլ կերպ հնարավոր չէ։ Հակառակ դեպքում Հայաստանի արևմտյան շրջանները (Թուրքիայի սահմանի մոտ) կմնան առանց ջրի։ Իսկ սահմանամերձ Ախուրյանի ջրամբարի ջուրը բոլորին չի բավականացնի (այն 60%-ով է լցված, և դրա միայն կեսն է կարելի վերցնել)։
Սևանից հավելյալ ջուր չվերցնելու համար 158 ստորգետնյա հորերը սովորականից ավելի երկար են շահագործվելու։ Նաև 37 նոր հորանցք է բացվելու։
