ԵՐԵՎԱՆ, 1 ապրիլի — Sputnik. Իրանի նախագահի՝ Ադրբեջան կատարած այցի հիմնական նպատակը Թուրքմենստանից գազատարի հնարավոր շինարարությունը խոչընդոտելու փորձի հետ է կապված, Sputnik Արմենիային ասաց քաղաքագետ Սերգեյ Շաքարյանցը։
Նրա խոսքով՝ Թուրքմենստանի միջոցով արտաքին ուժերը փորձել են ազդեցություն գործել Իրանի վրա, ինչի մասին վկայում են մարտի 21-ին երկու ձկնորսների սպանությունը։
Մարտի 21-ին Թուրքմենստանի սահմանապահները կրակ են արձակել և սպանել երկու իրանցի ձկնորսների։ Եվս երկուսին ձերբակալել են` իրենց տարածք ներխուժելու համար։ Թուրքմենստանի ԱԳՆ-ը հայտարարել է թմրանյութերի մաքսանենգության մասին, Իրանն, իր հերթին, բողոք է հայտնել՝ կապված թուրքմեն սահմանապահների ագրեսիվ գործողությունների հետ։
«Ռոհանիի այցը Թուրքմենստան և Ադրբեջան, առաջին հերթին, կապված է պայմանավորված է նրանով, որ Իրանը հաստատել է իր դիրքորոշումը Կասպից ծովի հատակով գազատարի շինարարության անհնարինության վերաբերյալ», — ասաց Շաքարյանցը։
Նրա կարծիքով՝ Իրանը Ռուսաստանի նման պահանջում է, որպեսզի դրա համար տրվի բոլոր մերձկասպյան երկրների համաձայնությունը, քանի որ Կասպից ծովի կարգավիճակը դեռ որոշված չէ։
«Թուրքմենստանում նա գաղտի բանակցություններ է անցկացրել, ես վստահ եմ, որ դրանց ընթացքում բացահայտ սպառնալիքներ են հնչել Թուրքմենստանի նախագահի հասցեին։ Համոզված եմ, որ նման սպառնալիքներ հնչել են նաև Իլհամ Ալիևի հասցեին, որպեսզի նա չփորձի կրկնել Բերդիմուհամեդովի սխալը», — ասաց Շաքարյանցը։
Քաղաքագետի խոսքով՝ Իրանի համար դժվար չի լինի ստեղծել իրավիճակ, որի դեպքում նրա զորքերը ստիպված կլինեն մտնել Թուրքմենստանի տարածք՝ հետապնդելով մաքսանենգներին։
Նա նշեց, որ Իրանը թույլ չի տա, որպեսզի ինչ-որ գազային նախագծեր անցնեն իր ջրային և ցամաքային սահմանների մոտով։
«Գազատարի հարցի պատճառով ընթացել և ընթանում է սիրիական պատերազմը։ Խոսքը գնացել է Իրան-Իրաք-Սիրիայից Միջերկրական ծով ձգվող գազատարի շինարարության մասին։ Դրան դեմ են եղել Իսրայելը, ԱՄՆ-ը, Քաթարը, Սաուդյան Արաբիան և Թուրքիան։ Թուրքիան գլխավոր դեր է կատարել Սիրիա ահաբեկիչներ ուղարկելու հարցում», — ասաց Շաքարյանցը։։
Հիշեցնենք, որ Ռոհանին այցի պաշտոնական օրակարգի շրջանակում հանդիպել է Իլհամ Ալիևի հետ, քննարկվել են երկկողմ հարաբերությունների զարգացման հարցեր։ Սպասվում է մի շարք երկկողմ փաստաթղթերի ստորագրում։
Ալիևը և Ռոհանին մասնակցել են «Խազար» ավտոմոբիլային գործարանի բացման արարողությանը։
