ԵՐԵՎԱՆ, 29 մարտի — Sputnik. Սևաստոպոլի դատարանի որոշմամբ Հայաստանի քաղաքացուն դատապարտել են վեցը տարի ազատազրկման ընդհանուր ռեժիմի գաղութում՝ հարձակումներ գործելու, խարդախությունների, ապօրինի գումարի լվացման համար։ Այս մասին հայտնում է Սևաստոպոլի Քննչական կոմիտեի մամուլի ծառայությունը։
Քննությունը պարզել է, որ դատապարտյալն ութ մարդուց բաղկացած խմբավորում է ստեղծել։ Նրանք ապօրինի կերպով հողատարածքներ էին զավթում, հետո վաճառում էին դրանք ու գումարը լվանում։
«Հանցավոր խմբավորումը հստակ մշակված սխեմայով է աշխատել, մասնակիցներն իրենց դերերն են ունեցել։ Նրանք հավաքում էին տեղի բնակիչների անձնական տվյալներն ու նրանց անշարժ գույքի փաստաթղթերը, հարևան երկրի տարածքում ուրիշների բնակարանները տնօրինելու համար նոտարական կեղծ լիազորագրեր էին պատրաստում, խմբավորման անդամները ներկայանում էին որպես սեփականատիրոջ ներկայացուցիչներ բնակարանի առքուվաճառքի հարցով, կեղծ փաստաթղթերը ներկայացնում էին առքուվաճառքի գրանցման կենտրոն», — ասվում է ՌԴ Քննչական կոմիտեի հաղորդագրության մեջ։
Խմբավորմանը հաջողվում էր ապօրինի ձեռք բերած որոշ օբյեկտներ մի քանի անգամ վաճառել։ Այն իր գործունեության ընթացքում ընդհանուր առմամբ 12 միլիոն ռուբլու վնաս է հասցրել։ Առայժմ նրանցից դատվել են երկուսը՝ Հայաստանի 48-ամյա քաղաքացին և նրա օգնականը՝ 34-ամյա տղամարդը (նրան 4,5 տարով են ազատազրկել)։ Դատապարտվածների անունները չեն բացահայտում։ Խմբավորման մնացած անդամները հետախուզման մեջ են։
