ԵՐԵՎԱՆ, 29 մարտի — Sputnik. Red Wings ավիաընկերությունն արդեն երկու շաբաթ է Երևանից Մոսկվա չվերթեր է իրականացնում և շատ գոհ է։ Ինքնաթիռի բեռնվածությունը 90% է կազմում։ Այս մասին հինգշաբթի լրագրողներին հայտնեց Red Wings ավիաընկերության գլխավոր տնօրեն Եվգենի Կլյուչարյովը։
Նա նշեց, որ Երևան–Մոսկվա–Երևան ավիատոմսի արժեքը բավական օպտիմալ է` 80 հազար դրամ (170 դոլար)` մինչև 23 կգ ուղեբեռի թույլտվությամբ։
Առաջին չվերթն իրականացվել է մարտի 18-ին։ Ներկա պահին ավիաընկերության ինքնաթիռները շաբաթական մեկ անգամ են չվերթ իրականացնում, մոտ ապագայում չվերթեր կիրականացվեն ամեն օր։
Sputnik Արմենիայի հարցին պատասխանելով` Կլյուչարյովը նշեց, որ ընկերությունը հույս ունի, որ «Զվարթնոց» օդանավակայանում սպասարկման գները կնվազեն և փոխգործակցման օպտիմալ մոդել կգտնվի։
Միևնույն ժամանակ «Զվարթնոցի» գլխավոր մենեջեր Մարսելո Վենդեն ընդգծեց, որ օդանավակայանի ծառայության արժեքից բողոքում են բոլոր ավիաընկերությունները. յուրաքանչյուր ընկերություն փորձում է իր համար լավագույն պայմաններ ստանալ։
«Մենք պատրաստ ենք Ռուսաստանում իր դասով լավագույն ավիաընկերություններից մեկին ցանկացած աջակցություն ցուցաբերել։ Մենք ողջունում ենք նրա մուտքը Հայաստանի ավիաշուկա», – ասաց նա։
2007 թվականից ընկերության բաժանորդներից մեկը դարձել է ռուս մեծահարուստ Ալեքսանդր Լեբեդևը, ինչից հետո ավիաընկերության գործերը լավացել են։ Այդ օրվանից այն հաջողությամբ զարգանում է։ Ներկա պահին ընկերության ավիապարկը համալրված է 7 ինքնաթիռով` 3 հատ Airbus 321 և 4 հատ Airbus 320։
Red Wings–ը հիբրիդային ավիաընկերություն է, որը համատեղում է լոուքոսթի և դասական ծառայությունների տարրեր։ Ռուսական շուկայում գործում է արդեն 19 տարի։
