Արմենուհի Մխոյան, Sputnik.
Գյումրիում հարգանքի տուրք մատուցեցին Կեմերովոյում տեղի ունեցած ողբերգության զոհերի հիշատակին և այսօր` մարտի 28-ին, ժամը 18։00-ին, սպիտակ փուչիկներ բաց թողեցին երկինք։
«Մենք 4-ով՝ ես, Կարենը, Միլան և Նիկիտան, որոշեցինք հիշատակի միջոցառում կազմակերպել Գյումրու Մայր Հայաստան հուշահամալիրի տարածքում։ Տեղեկացրինք մեր ծանոթներին։ Շատերը միացան մեզ, և սպիտակ փուչիկներ բաց թողեցինք երկինք՝ ի հիշատակ անմեղ զոհերի»,- Sputnik Արմենիային ասաց Գյումրիում բնակվող Վիկտորյա Ժիգուլովան՝ հուսալով, որ բոլոր մեղավորները կպատժվեն ամենայն խստությամբ:
Մարդիկ շարունակում են ծաղիկներ ու խաղալիքներ դնել Հայաստանում ՌԴ հյուպատոսարանի ճաղավանդակների մոտ: Սև ժապավենով գրված է. «Կեմերովո, մենք քեզ հետ ենք»: Մարդիկ գալիս են ընտանիքներով, հարգանքի տուրք են մատուցում և՛ այս պահին Գյումրիում ժամանակավոր բնակություն հաստատած ռուսները, և՛ տեղաբնակները։
9 տարեկան Օլյան ևս մայրիկի ու հարազատների հետ եկել էր մոմ վառելու ու ծաղիկ խոնարհելու:
«Ես շատ եմ ցավում, թող պատժվեն բոլոր նրանք, ովքեր մեղավոր են»,- նշեց փոքրիկը։
Կեմերովոյի «Զիմնյայ վիշնյա» առևտրի կենտրոնում մարտի 25–ին բռնկած հրդեհի զոհ են դարձել 64 մարդ: Ռուսաստանում 100 տարվա ընթացքում գրանցված հրդեհների ցանկում այս ողբերգությունն ամենախոշորներից մեկն է զոհերի քանակով։ Խոշոր հրդեհներ են եղել Սամարայի Ներքին գործերի վարչությունում (1999 թվական, 57 զոհ), Կրասնոդարի երկրամասի Կամիշևատսկայա ավանի ծերանոցում (2007 թվական, 63 զոհ) և Պերմի «Խրոմայա լոշադ» ակումբում (2009 թվական, 153 զոհ)։
