ԵՐԵՎԱՆ, 27 մարտի — Sputnik. Երևանում Ռուսաստանի դեսպանատան մոտ այսօր՝ մարտի 27-ի առավոտից բազմաթիվ քաղաքացիներ են այցելում և ծաղիկներ ու խաղալիքներ դնում` հարգանքի տուրք մատուցելով Կեմերովոյում տեղի ունեցած ողբերգության զոհերին:
«Երեխան երեխա է։ Ի՞նչ տարբերություն` ում երեխան է։ Սարսափելի կորուստ է»,- Sputnik Արմենիայի թղթակցին ասաց Աննան, որն ընկերների հետ եկել էր հարգանքի տուրք մատուցելու «Զիմնյայա վիշնյա» առևտրի կենտրոնում մահացածների հիշատակին։
Ռուսաստանի դեսպանատան մոտ էին հավաքվել նաև Պլեխանովի անվան ռուսական տնտեսական համալսարանի հայաստանյան մասնաճյուղի ուսանողները։
«Մենք եկել ենք ռուսաստանցիներին սատարելու ինչով կարող ենք` ծաղիկներով, խաղալիքներով, մոմերով։ Ցավակցում ենք մահացածների հարազատներին ու բարեկամներին»,- Sputnik Արմենիային ասաց համալսարանի ուսխորհդրի ներկայացուցիչ Նիկոլայ Դրոզդովը։
ՌԴ ԱԻՆ վերջին տվյալների համաձայն` ողբերգության հետևանքով մահացել է 64 մարդ։ Հրդեհը բռնկել է Կեմերովոյի «Զիմնյայա վիշնյա» քառահարկ առևտրի կենտրոնում մարտի 25-ին, պատճառները դեռ պարզվում են։
Հիմնական վարկածները երկուսն են. կա՛մ երեխաներն են այրել խաղասենյակի պորոլոնը, կա՛մ հրդեհի պատճառ են դարձել մանկական տոնի ժամանակ վառած մոմերը։ Կրակը տարածվել է ավելի քան 1500 քմ մակերես ունեցող տարածքում։ Հակահրդեհային համակարգը չի աշխատել, մարդկանց չեն տարհանել։
Ռուսաստանում 100 տարվա ընթացքում գրանցված հրդեհների ցանկում այս ողբերգությունն ամենախոշորներից մեկն է զոհերի քանակով։ Խոշոր հրդեհներ են եղել Սամարայի Ներքին գործերի վարչությունում (1999 թվական, 57 զոհ), Կրասնոդարի երկրամասի Կամիշևատսկայա ավանի ծերանոցում (2007 թվական, 63 զոհ) և Պերմի «Խրոմայա լոշադ» ակումբում (2009 թվական, 153 զոհ)։
