ԵՐԵՎԱՆ, 27 մարտի — Sputnik. Անօթևան Նորիկ Հովակիմյանը չորս տարի առաջ հայտնվել էր փողոցում։ Անօթևան մարդկանց նվիրված օրվա կապակցությամբ ՌՈՄԲ գործակալությունը տեսանյութ է պատրաստել Նորիկին բնականոն կյանքի վերադարձնելու մասին։
56-ամյա Նորիկը 2015թ.-ին հայտնվել է անօթևան մարդկանց օգնության «Օսելյա» միությունում, որտեղ նրան օգնել են հոգեբանը և քահանան։
«Ես բավական ժամանակ ունեի` մտածելու համար, թե ինչպես շարունակեմ ապրել», — ասել է Նորիկը։
Սյուժեի հերոսը որոշել է զբաղվել հողագործությամբ։ Քահանան նրան է նվիրել իր հին տունը և հողամասը, իսկ հոգեբանը գումար է տվել` սեփական գործը սկսելու համար։
Այսօր Ուկրաինայում` Լվովշչինայում, նա սեփական ջերմոցներն ունի, որտեղ սոխ, կանաչի և բանջարեղեն է աճեցնում ու երազում աշխատանքով, տանիքով ապահովել մյուս անօթևան մարդկանց։ Միաժամանակ Նորիկը չի բավարարվում ձեռք բերածով։ Նա մտադիր է ազնվամորի աճեցնել և առաքել ուկրաինական շուկա։
«Մարդկանց առողջությունն ինձ համար ավելի թանկ է, քան բիզնեսը և փողը», — ասում է Հովակիմյանը տեսանյութում։
Նորիկին օգնում են «Օսելյայից» նրա ընկերները, որոնք աշխատանքի դիմաց որևէ վարձատրություն չեն ստանում։ Ուստի Հովակիմյանը հովանավորներ է որոնում, որպեսզի նրանք կարողանան ապրուստի գումար վաստակել։
«Ես գիտեմ, թե ինչ է փողոցը։ Ես ուզում եմ, որպեսզի յուրաքանչյուր մարդ տանիք ունենա, ուզում եմ հնարավորինս շատ մարդկային կյանքեր փրկել։ Պետք է ձգտել դրան, գնալ առաջ և չկոտրվել»,- նշում է հայը։
Նշենք, որ Նորիկը շաքարային դիաբետ ունի և պետք է մշտապես ինսուլինի ներարկում ստանա։ Սակայն Նորիկը չի վհատվում և ապագայի հետ կապված հույսեր ունի։
