ԵՐԵՎԱՆ, 26 մարտի — Sputnik. ԱՄՆ-ն և Եվրամիության մի շարք երկրներ որոշել են արտաքսել ռուս դիվանագետներին։ Ինչպես հաղորդում է ՌԻԱ Նովոստին, Սպիտակ տան ներկայացուցիչը հայտարարել է լրագրողներին, որ Վաշինգտոնը մտադիր է արտաքսել մի քանի տասնյակ ռուս դիվանագետների և փակել Սիեթլում Ռուսաստանի հյուպատոսարանը։
Եվ եթե դիվանագետների դեպքում այդ ամենն արվում է ի նշան «Սկրիպալի գործում» Մեծ Բրիտանիայի հետ համերաշխության, ապա հյուպատոսարանի փակումը բացատրվում է նրանով, որ այն մոտ է ամերիկյան սուզանավերի բազային։
Ռուս դիվանագետները կարտաքսվեն Գերմանիայից, Ֆրանսիայից և Լեհաստանից։ Ինչպես հաղորդել է լեհական ԶԼՄ-ներին երկրի ԱԳՆ ղեկավարը, ռուս դիվանագետներից չորս պետք է Լեհաստանը լքեն մինչև ապրիլի 3-ի կեսգիշերը։ Միաժամանակ նախարարը չի բացառել, որ Ռուսաստանը նմանատիպ քայլեր կձեռնարկի։
Եվս չորս դիվանագետներ կլքեն ԳԴՀ տարածքը։ «Այսօր մենք չորս ռուս դիվանագետի ենք արտաքսել Գերմանիայից, քանի որ Սոլսբերիում թունավորումից հետո Ռուսաստանը դեռ չի նպաստում միջադեպի բացահայտմանը», — նշված է ԳԴՀ ԱԳՆ-ի Twitter-յան էջում։ Արտգործնախարար Հայկո Մաասի խոսքով` այդ որոշումը հեշտ չի կայացվել։
«Ավագ գործընկերներից» հետ չեն մնում նաև Եվրամիության ավելի փոքր երկրները։ Ինչպես հաղորդում է Twitter-ի իր էջում Լիտվայի արտգործնախարար Լինաս Լինկյավիչյուսը, Վիլնյուսը որոշել է վտարել ռուս երեք դիվանագետի։ Նման քայլեր են ձեռնարկել նաև Լատվիան և Էստոնիան։
Ընդհանուր առմամբ, ռուս դիվանագետներին արտաքսելու մասին որոշում են ընդունել ԵՄ 14 երկրներ, այդ թվում` Ֆրանսիան։
