ԵՐԵՎԱՆ, 26 մարտի — Sputnik. Ռազմական ոստիկանության ստորաբաժանումներ են ստեղծվելու Հայաստանում տեղակայված Ռուսաստանի 102-րդ ռազմակայանում։ Այս մասին հայտնում է հարավային ռազմական օկրուգի մամուլի ծառայությունը։
Նշվում է, որ Գյումրիում նախկինում կարգուկանոնը պահպանելու համար առանձին պարեկային պահակախմբեր էին հատկացվում, սակայն դրանց կազմում ընդգրկված զինծառայողները հատուկ պատրաստվածություն չունեին։ Ջոկատները, որոնք այսօր են ստեղծվում, համալրված կլինեն Վլադիկավկազի ռազմական ոստիկանության ուսումնական կենտրոնում պատրաստվածություն անցած մասնագետներով։
«Զինվորական կարգապահությունը, ճանապարհային երթևեկության անվտանգությունը և Գյումրիի ռազմական կայազորի օբյեկտների պաշտպանությունն ապահովելու համար ռազմական ոստիկանության ստորաբաժանում է ձևավորվում։ Անձնակազմը հատուկ հանդերձանք կստանա և հաստիքային սպառազինությամբ, ռազմական տեխնիկայով և հատուկ միջոցներով զինված կլինի», – նշվում է հաղորդագրության մեջ։
Գերատեսչությունում ընդգծել են, որ անձնակազմի ընտրությունը կատարում են ռազմական հոգեբանները` պայմանագրային ծառայություն իրականացնող սպաներից, սերժանտներից և զինվորներից։ Գյումրիի կայանում, բացի ռազմական ոստիկանության ջոկատներից, ռուսական բանակի վերապատրաստման ամառային շրջանի սկզբին Երևանի կայազորում ևս մեկ ռազմական ոստիկանության ստորաբաժանում է նախատեսվում ստեղծել:
