ԵՐԵՎԱՆ, 25 մարտի — Sputnik. Շիրակում, Լոռիում, Տավուշում, Գեղարքունիքում, Սյունիքում և Արցախում վտանգավոր քամիները դեռ շարունակվում են։ Այս մասին Sputnik Արմենիայի թղթակցի հետ զրույցում հայտնեց ՀՀ ԱԻՆ տեղեկատվության և հասարակայնության հետ կապերի վարչության պետի տեղակալ Նարինե Գնդոյանը։
«Առաջիկա գիշերը քամին աստիճանաբար կհանդարտվի, մայրաքաղաքում և մարզերում վաղն արդեն իրավիճակը կհստակեցվի»,- ասաց նա։
Իսկ մինչև այդ ԱԻՆ-ը շարունակում է մարզերում տեղի ունեցող պատահարների վերաբերյալ օպերատիվ տեղեկատվություն ստանալ։ Ինչպես հայտնեց մեր զրուցակիցը` երկօրյա պատահարների ամբողջական վերլուծությունը նախարարությունում կկատարվի միայն երկուշաբթի, երբ հավաքագրվեն բոլոր պատահարների մասին տեղեկությունները։
Բայց արդեն հայտնի է, որ երկօրյա հողմերը մեծ վնասներ են պատճառել, անգամ մեկ մարդկային կյանք են խլել։
Մարտի 24-ին Արցախի զորամասերից մեկում ուժեղ քամու հետևանքով տապալված ծառից վիրավորվել ու մահացել է ՊԲ զինծառայող, 1999թ. ծնված Արմեն Համայակի Հարությունյանը:
Իսկ Երևանում ծառը շրջվել է փողոցում կայանած Toyota camry և Volkswagen Jetta մակնիշի ավտոմեքենաների վրա, որոնցում բարեբախտաբար մարդ չի եղել։ Բայց մեքենաները վնասվել են։
Երևան-Սևան ավտոճանապարհի մոտ նունպես բարդին կոտրվել է ու ընկել ճանապարհի վրա։
Սյունիքի, Արագածոտնի, Արմավիրի, Արարատի, Տավուշի, Շիրակի, Լոռու մարզերում քամուց վնասվել են տասնյակ տների ու կցակառույցների տանիքներ,պատուհաններ ու ծառեր են կոտրվել։
Կոտայքի մարզում ևս քամին տասնյակ տների տանիքներ է վնասել, այդ թվում` Աբովյան քաղաքում գտնվող «Կոտայք» գարեջրի գործարանի և Եղվարդի թիվ 3 հիմնական դպրոցի տանիքները։
Դիլիջանում ուժեղ քամուց վնասվել է Հովհաննես Շարամբեյանի անվան մանկական գեղարվեստի դպրոցի տանիքի մի մասը, պոկել է այն ու նետել փողոց։
Գյումրիում տասնյակ տներից զատ քամին վնասել է նաև «Շիրակ» օդանավակայանի ժամանման սպասասրահի տանիքը։
Նշված դեպքերից որևէ մեկի հետևանքով, բարեբախտաբար, մարդիկ չեն տուժել։
ԱԻՆ-ի վերջին` մարտի 24-ի ժամը 20:00-ի դրությամբ կատարված վերլուծության համաձայն` միայն մարտի 24-ին ուժեղ քամին քանդել է 67 շինության տանիք, վնասել է 5 ավտոմեքենա` 2-ը Երևանում, 3-ը Լոռու մարզում, շրջել 8 ծառ` 7-ը Երևանում, 1-ը Արագածոտնի մարզում։
Հայաստանում 2 օր մոլեգնող հզոր քամին Հայաստան ներթափանցող տաք օդային հոսանքների և Սև ծովի վրա առկա ցուրտ օդի բախման հետևանք է։
Շիրակում, Լոռիում, Տավուշում, Գեղարքունիքում, Սյունիքում և Արցախում քամու պոռթկումները հասնում են 30-35, Կոտայքում, Արմավիրում, Արագածոտնում, Արարատում, Վայոց Ձորում և Երևանում` 20-25 մ/վրկ-ի։
