ԵՐԵՎԱՆ, 25 մարտի — Sputnik. Հերթական գողությունից հետո ոստիկաններին հաջողվել է գտնել մի շարք գողություններ կատարած Էդգար Բունիաթյանին։
Դեպքի մասին ոստիկաններին հաղորդում էր տվել նրա զոհերից մեկը` նշելով, որ Երևանի Նալբանդյան փողոցում կայանած իր ավտոմեքենայի սրահից գողացել են պայուսակ, բջջային հեռախոս, օծանելիք, համակարգչի հիշողության կրիչ և այլն։
Օպերատիվ հետախուզական աշխատանքների արդյունքում ոստիկանները պարզել են, որ գողությունը հնարավոր է կատարած լինի Էջմիածին քաղաքի բնակիչ, 29-ամյա Էդգար Բունիաթյանը։
Ոստիկանների բացատրական աշխատանքից հետո Բունիաթյանը ներկայացել է ոստիկանության բաժին ու խոստովանել ոչ միայն այդ, այլև նախկինում կատարած այլ հանցանքներ։
Մարտի 20-ին նա Հյուսիսային պողոտայում գողացել է հեծանիվ, մարտի 19-ին Վազգեն Սարգսյան փողոցում կայանված ավտոմեքենայից` պայուսակ, որի մեջ եղել է 3 բջջային հեռախոս և գումար։
