ԵՐԵՎԱՆ, 25 մարտի — Sputnik. ԽՍՀՄ ժողովրդական արտիստ Արմեն Ջիգարխանյանի նախկին կինն ակամա խոստովանել է, որ ռեժիսորը ծախսել է դերասան Օլեգ Տաբակովից պարտքով վերցրած գումարը։ Այս մասին հայտնում է «Կոմսոմոլսկայա պրավդա» թերթը։
«Արմեն Բորիսովիչն ասում էր, որ Ամերիկայում տուն գնելու համար Օլեգ Տաբակովը նրան պարտքով 150 հազար դոլար է տվել։ Մի ժամանակ նա շատ էր հյուրախաղերի մեկնում։ Աշխատում էր, որ պարտքը մարեր։ Միաժամանակ ամեն ամիս 2-3 հազար դոլար էր ուղարկում Տատյանա Սերգեևնային, որն արդեն Ամերիկայում էր ապրում։ Դա շարունակվում էր, անգամ երբ նրանք փաստացի այլևս ամուսիններ չէին և միասին չէին ապրում», — խոստովանել է դերասանի նախկին կինը։
Նրա խոսքով՝ «մինչև 2002 թվականը, երբ Ջիգարխանյան ուղեղի կաթված ստացավ, շատ էր աշխատում։ Սակայն նրա աշխատավարձն այսօր էլ բարձր չէ՝ ամսական մոտ 300 հազար ռուբլի է (մոտ 5200 դոլար)։ Աշխատավարձն այդքան է լինում, երբ նա երկու անգամ բեմ է ելնում։ Եթե բեմ չի ելնում, ապա թատրոնի տնօրենի աշխատավարձը 100 հազար ռուբլի է (մոտ 1700 դոլար)։
«Նա միշտ կանխիկ մի քանի հարյուր հազար ռուբլի էր ստանում, որը պահում էր իր չհրկիզվող պահարանում։ Տարօրինակ է, երբ նրա ընկերները պնդում են լրագրողներին, թե Ջիգարխանյանը լքել է Վիտալինային՝ գրպանում միայն մանրադրամ ունենալով։ Դա սուտ է», — պարզաբանել է Ցիմբալյուկ-Ռոմանովսկայան։
Ժողովրդական արտիստի նախկին կինը շարունակում է մեղադրել Ջիգարխանյանի ընկերներին իրենց ամուսնական կյանքի փլուզման համար։ Ըստ նրա վարկածի՝ նրանք ուզում են ոչ միայն յուրացնել իրենց ունեցվածքը, այլև իրեն բանտ նստեցնել։ Հոկտեմբերին, երբ սկսվեց վիճաբանությունը, Ջիգարխանյանը (կամ որևէ մեկը նրա անունից) դիմում էր գրել քննչական կոմիտե։
«Այն ժամանակվանից Մոսկվայի Հարավարևմտյան շրջանի քննչական կոմիտեն հիմքեր է փնտրում ինձ բանտարկելու համար» — նշել է Վիտալինան։
Վիտալինային դեմ քրեական գործ է հարուցվել անձնական կյանքի անձեռնմխելիությունը խախտելու մասին հոդվածով (ՌԴՔՕ 137 հոդված)՝ թաքնված տեսախցիկով նկարահանում իրականացնելու համար։ Դեկտեմբերին նա երկրից չբացակայելոււ մասին փաստաթուղթ է ստորագրել։
Նա ընդգծել է, որ իրեն մեղադրում են, սակայն մոռանում են, որ տեսանյութերում լավ խմած տղամարդիկ են երևում՝ Ջիգարխանյանը, Սողոմոնյանն ու Հայրապետ Հովհաննիսյանը, որոնք ուշ երեկոյան նստած են պետական թատրոնում ու քննարկում են՝ ինչպես քրեական գործ հարուցել նրա ընտանիքի դեմ։ Նա պնդում է նաև, որ թաքնված տեսախցիկներն իր հայրը չի տեղադրել (որը թատրոնի ինժեներն է), ինչպես փորձում է ներկայացնել իր նախկին ամուսնու շրջապատը։
Նա նաև զղջում է, որ չնայած իր մի շարք սիրավեպերի մասին բազմաթիվ լուրեր են տարածվել, բայց նա մինչ այժմ սիրեկան չունի։
«Սկսած 2001 թվականից, երբ սկսվեցին Արմեն Բորիսովիչի հետ հարաբերություններս, իմ կյանքում ուրիշ տղամարդ չի եղել։ Իսկ այն միգրանտները, որոնք հեռուստաշոու են գալիս ու հայտարարում, որ իմ սիրականն են եղել, պարզապես խղճուկ են։ Նրանք կյանքում այնքան չկայացած են, որ այլ կերպ չեն կարող գումար վաստակել», — ասել է Վիտալինան։
Մի քանի ամիս շարունակ հասարակությունը քննարկում է Արմեն Ջիգարխանյանի ու նրա երիտասարդ կնոջ շուրջ ծավալված սկանդալը։ Դերասանը հայտարարել է, որ կինը խաբեությամբ յուրացրել է փողերը, իր անունով դարձրել անշարժ գույքն ու մահափորձ կազմակերպել։ Վիտալինան իր հերթին հայտարարել է, որ որևէ հարցում մեղավոր չէ, ավելին` նա կատարվածի համար մեղադրում է Ջիգարխանյանին շրջապատող մարդկանց։ Նշենք, որ նախորդ տարվա նոյեմբերի 27-ին Մոսկվայի Կունցևոյի 202-րդ շրջանի դատական տեղամասը բավարարել է դերասան և ռեժիսոր Արմեն Ջիգարխանյանի ու Վիտալինա Ցիմբալյուկ-Ռոմանովսկայայի ամուսնալուծության դիմումը։
