ԵՐԵՎԱՆ, 23 մարտի — Sputnik. «Սարատովյան ավիաուղիներ» ավիաընկերությունը չեղյալ է հայտարարել ամեն շաբաթ իրականացվող Սարատով-Երևան չվերթը։ Այս մասին «Վզգլյադ-ինֆո»-ին հայտնել են չվերթի` ընկերությունից SMS-հաղորդագրություն ստացած ուղևորները։ Նրանց տեղեկացրել են, որ դեպի Երևան չվերթերը հետաձգվում է մարտի 27-ից մինչև հոկտեմբերի 23-ը։
Սարատովի օդանավակայանի տեղեկատու ծառայությունից պարբերականին հաստատել են չվերթի չեղարկումը մինչև հոկտեմբեր, սակայն միևնույն ժամանակ հավաստիացրել, որ տոմսերի համար վճարած գումարները հնարավոր է ստանալ այն ընկերություններից, որտեղ ուղևորները դրանք ձեռք են բերել։
Սարատովի հայկական համայնքային կազմակերպության փոխնախագահ, շրջանի հասարակական պալատի անդամ Արայիկ Քոսյանին զայրացրել է ավիաընկերության որոշումը։ Նա հայտարարել է, որ իրավիճակը հնարավոր կլինի շտկել դաշնային իշխանությունների միջամտության միջոցով։
Նա պարբերականին հայտնել է` բացի այն, որ իրավիճակի պատանդ էին դարձել էթնիկ հայեր, մեծ հարցականի տակ է հայտնվել Սարատովից դեպի Հայաստան զբոսաշրջիկների այցելության հարցը։
Նրա խոսքով` զբոսաշրջային սեզոն է բացվում, և Սարատովի բնակիչներից շատերը ծրագրում էին Հայաստանում հանգստանալ։
«Բանն այն է, որ Հայաստանում հանգիստը բավական մատչելի է և միևնույն ժամանակ սպասարկման որակն այնտեղ բարձր է։ Մենք կխորհրդակցենք մեր համայնքի անդամների հետ, և բացառված չէ, որ դիմում կնախապատրաստենք», — նշել է Քոսյանը։
