ԵՐԵՎԱՆ, 23 մարտի — Sputnik. Պետությունը մտադիր է սկզբնական շրջանում օգնել հայաստանցի արտահանողներին։ Այս մասին այսօր լրագրողներին հայտնեց Հայաստանի արտահանման ապահովագրական գործակալության գործադիր տնօրեն Արմեն Շահնազարյանը:
Գործակալությունը ապահովագրում է արտահանողներին այն դեպքերի համար, եթե նրանց արտասահմանյան գործընկերներն ինչ-ինչ պատճառներով չվճարեն տնտեսվարողների գումարները, այսինքն` ֆակտորինգի ծառայություններ են առաջարկում։ Դրա շնորհիվ արտահանողները ստիպված չեն շաբաթներով կամ նույնիսկ ամիսներով վճարումների սպասել։
Արտահանողներին ապահովագրում են նաև այն դեպքերի համար, եթե նրանք առժամանակ չեն կարողանում մուծել բանկերից վերցրած վարկերը։ Պետական ընկերության այդպիսի երաշխիքով բանկերն ավելի շահավետ պայմաններով են վարկ տրամադրում։
Բիզնեսին կօգնեն սաղմնավորման շրջանից
«Ինչի՞ց է սկսվում արտահանումը։ Պետք է սարքավորումներ ներկրել` դրանցով ինչ-որ բան արտադրելու համար։ Այդ պատճառով ապագայում ուզում ենք ապահովագրել ընկերություններին այն դեպքերում, եթե նրանք չկարողանան վճաել հաստոցների և արտադրության այլ սարքերի ներմուծման համար», — հայտնեց Շահնազարյանը։
Ընդհանուր առմամբ` 2015-17 թվականներին գործակալության ապահովագրման փաթեթը կտրուկ աճել է` 400 միլիոն դրամից մինչև 2,2 միլիարդ դրամ, հետո`մինչև 4,5 միլիարդ դրամ։
Հիմնականում ֆինանսավորում են 50 հազար դոլարի սահմաններում կնքված գործարքները, որպես կանոն` փոքր ու միջին բիզնեսին, որը միշտ չէ, որ շուկայական պայմաններում կարող է իրեն ֆակտորինգ թույլ տալ։
Առաջին տարիներին ընկերությանը դիմում են հիմնականում դեպի Ռուսաստան արտահանողները (գործարքների 90%-ը)։ 2017 թվականին ռուսական շուկան կրկին գերիշխում էր (74%)։ Դրան գումարվել է ԱՄՆ-ից համակարգչային ծրագրերի ներմուծման ապահովագրությունը։ Եվրոպական երկրներին փոքր ծավալներ են բաժին ընկնում։
2016 թվականից գործակալությունը համագործակցում է նմանատիպ պետական գործակալությունների հետ Եվրասիական միությունում, այդ թվում Արտահանման վարկերի ու ներդրումների ապահովագրման ռուսական գործակալության հետ։
«Մենք կարող ենք ապահովագրել շուկայում միմյանց հետ աշխատող մեր ընկերությունների ռիսկերը։ Այդ դեպքում մեր ընկերություններն ավելի հանգիստ կվաճառեն իրենց մոտ, իսկ նրանց ընկերությունները` մեզ մոտ», — պարզաբանեց Շահնազարյանը։
Գործակալության հիմնադիրն ու 100%-ոց սեփականատերը Հայաստանի կառավարությունն է։ Գործակալության գործարքների ռիսկերի 90%-ը վերաապահովագրում է Swiss Re շվեյցարական ապահովագրողը։
