Վորոնեժում վթարից տուժած ՀՀ 9 քաղաքացիները հիվանդանոցում են, որոնից 3-ը վերակենդանացման բաժանմունքում են, վեցը` վիրաբուժական բաժանմունքում։ Sputnik Արմենիային այս մասին հայտնեց ՀՀ արտակարգ իրավիճակների նախարարության Փրկարար ծառայության Ճգնաժամային կառավարման ազգային կենտրոնի (ՃԿԱԿ) օպերատիվ հերթափոխի պետ Հարություն Չեբեյանը։
«Ժամը 11։00-ի դրությամբ մենք կապ ենք հաստատել ՌԴ-ում Հայաստանի դեսպանատան մեր ներկայացուցչի հետ, ինչպես նաև Պավլովսկ քաղաքի հիվանդանոցի վերակենդանացման բաժանմունքի աշխատակիցների հետ, մեզ հայտնել են, որ քաղաքացիներից Տիգրան Բաբաջանյանի վիճակը կայուն ծանր է, Դավիթ Սարդարյանինը` ծայրահեղ ծանր, Եղիշե Համաբարձումյանինը` կայուն ծանր»,- նշեց նա։
Մյուս վեցի վիճակը բավարար է։ Նրանք են Մելիք Հայրապետյանը, Արկադի Թադևոսյանը, Արմենուշ Մուրադյանը, Վարյա Օհանյանը, Վազգեն Գևորգյանը, Դավիթ Վերմիշյանը։
Չեբեյանի խոսքով` ՀՀ առողջապահության նախարարության աշխատակիցները կապ են պահում իրենց գործընկերների հետ, ԱԻՆ-ն էլ` իր գործընկերների ու հայ համայնքի ներկայացուցիչների հետ։ Անհետաձգելի բուժօգնությունը տրամադրվել է մեր քաղաքացիներին։ Հետագա բուժօգնության հարցը կպարզվի ավելի ուշ։
