ԵՐԵՎԱՆ, 19 մարտի — Sputnik. Լիբիայի սպանված առաջնորդ, գնդապետ Մուամար Քադաֆիի որդին` Սեյֆ ալ Իսլամ Քադաֆին, մտադիր է մասնակցել հանրապետութունում նախագահի ընտրություններին` սեփական թեկնածությունն առաջադրելով։ Այս մասին հայտնում է ՌԻԱ Նովոստին` նրա ներկայացուցիչ Հայման Բուրասի խոսքերին հղում անելով։ Նախորդ տարվա դեկտեմբերին Քադաֆիների ընտանիքի մամուլի քարտուղար Բասեմ ալ Հաշիմի ալ Սուլը ՌԻԱ Նովոստիին տեղեկացրել է, որ Լիբիայի նախկին առաջնորդի որդին «մոտակա օրերին կհայտարարի երկրի նախագահի ընտրություններին իր թեկնածությունն առաջադրելու մասին»։
Թեկնածուի ներկայացուցիչը և քաղաքական հարցերով իրավասու Հայման Բուրասը նման հայտարարություն է արել Թունիսի մայրաքաղաքում` նշելով, որ Քադաֆի կրտսերը փորձում է փրկել երկիրը։
«Սեյֆ ալ Իսլամ Մուամար ալ Քադաֆին, առաջիկա նախագահական ընտրություններին իր թեկնածությունն առաջադրելով, ոչ թե իշխանության է ձգտում, այլ երկիրը փրկելուն»,- ասել է նա։
Անցած տարեվերջին Քադաֆիի առաջադրման մասին տեղեկացրել էր նրանց ընտանիքի ներկայացուցիչ ալ Հաշիմի ալ Սուլը։
Լիբիայում նախագահական ընտրությունները նախատեսվում են 2018թ. կեսին։ Մուամար Քադաֆիի ռեժիմը տապալվել է 2011 թվականին։
Այժմ Լիբիան խոր ճգնաժամի մեջ է. արևելքում Թոբրուկ քաղաքում նստում է համազգային ընտրություններով ընտրված խորհրդարանը, իսկ արևմուտքում` Տրիպոլի մայրաքաղաքում իշխում է ազգային համաձայնության իշխանությունը, որը ձևավորվել է Եվրամիության և ՄԱԿ-ի ներքո։
