ԵՐԵՎԱՆ, 19 մարտի — Sputnik. Մեկ շաբաթ առաջ ամերիկյան Niagara-gazette պարբերականն անդրադարձել է Հայաստանից արտագաղթած գործարար Լեո Դարդարյանի պատմությունը։ Այսօր օնլայն կայքը հոդված է հրապարակել` «Շատ ավելին Louis' Restaurant-ի և հայկական եկեղեցու մասին» վերնագրով։
Հրապարակման հեղինակը` Նորմա Հիգսը, նախ անդրադարձել է Հայաստանից ամերիկյան Նիագարա Ֆոլս արտագաղթած Դարդարյանի կարիերային` գրելով, որ նա իր աշխատանքային գործունեությունը սկսել է ռեստորանում սպասք լվանալուց։ Բայց ավելի ուշ դարձել է հեղինակավոր հաստատության համասեփականատեր։
«Ռոզենբլյումի հրաժարականից հետո Լեոն Սեմ Ֆրիդմանի հետ դարձել է Louis' Restaurant-ի տերերից մեկը։ Գործընկերները մեծ հաջողությունների են հասել, և 1948թ.-ի մայիսին երկու շաբաթով փակել են հաստատությունը` սրահը հիմնանորոգելու համար։ Niagara Falls Gazette-ի` 1984թ.-ի մայիսի 5-ի թողարկումը ծանուցել է հաստատության հանդիսավոր բացման մասին` նորացված սրահով և խոհանոցով։ Աշխատանքների ընդհանուր արժեքը կազմել է 50 հազար դոլար»,- գրում է հոդվածի հեղինակը։
Ըստ նրա` 1951թ.-ի օգոստոսին նույն թերթը հրապարակել է եկեղեցում պահվող փաստաթղթեր, որոնք պատկանում են տեղի հայ եկեղեցականների գրչին։
Դրանցում նկարագրվել է, որ Լեո Դարդարյանը գանձապահ եղած ժամանակ երկար և նպատակասլացորեն գումար է կուտակել իր երազանքն իրականացնելու` Նիագարա Ֆոլսում հայկական եկեղեցին տեսնելու համար։
«Եկեղեցու հիմնարկեքը տեղի է ունեցել 1952թ.-ի հունիսին, իսկ 1953թ.-ի սեպտեմբերին այն օծվել է։ Այդ պատմական իրադարձություններին Լեո Դարդարյանը, ինչպես նաև ամբողջ հայ համայնքը, շատ հպարտացել է։ Նա նաև տարբեր հասարակական կազմակերպությունների ակտիվ անդամ է եղել», — նշում է լրագրողը։
Վերադառնալով Louis' Restaurant-ին` հոդվածագիծը նշում է, որ Դարդարյանի և Ֆրիդմանի ղեկավարությամբ այն աշխատել է ավելի քան 50 տարի։
«Ավելի ուշ հայ գործարարը հարցազրույցներից մեկում ասել է. «Մարդիկ հակված են ենթադրել, որ ռեստորանը հեշտությամբ մեծ փողեր վաստակելու միջոց է»։ Որոշ նախանձ մարդիկ հիասթափվել են, երբ իմացել են, որ Լեոն աշխատել է օրական 10-12 ժամ, շաբաթական 7 օր` վերահսկելով ամբողջ աշխատանքը` ընդհուպ մինչև խոհանոցում ճաշատեսակներ պատրաստելու գործընթացը», — գրում է Հիգսը։
Հոդվածում նշված է, որ 1959թ.-ին ռեստորանում Լեո Դարդարյանը ուղղեի կաթված է ստացել և մի քանի ժամ անց մահացել է «Մեմորիալ» հիվանդանոցում` այդպես էլ գիտակցության չգալով։
