ԵՐԵՎԱՆ, 18 մարտի – Sputnik, Արմենուհի Մխոյան. Տեղական ժամանակով ուղիղ ժամը 20։00–ին փակվեցին Հայաստանում գործող ընտրատեղամասերը։ ՌԴ նախագահի ընտրություններն այս անգամ բավական մեծ հետարքրություն էր առաջացրել Գյումրիում:
Վաղ առավոտից խմբերով Գյումրի էին եկել ընտրական իրավունք ունեցող ՌԴ քաղաքացիներ Շիրակի մարզի բոլոր տարածաշրջաններից, Լոռու մարզից և Ջավախքից: Վրաստանից նույնպես մեքենաներով Գյումրի էին եկել այն ՌԴ քաղաքացիները, ովքեր ցանկանում էին կատարել իրենց քաղաքացիական պարտքը:
Գյումրիում հյուպատոսարանի առջև օրվա մեջ ժամանակ առ ժամանակ հերթ էր գոյանում`քվեարկության իրենց հերթին էին սպասում շատերը: Ոմանք ստիպված էին մինչև տեղամաս մտնելն ավելի քան 40 րոպե սպասել դրսում, ու չնայած հասցրել էին այդ ընթացքում մրսել, սակայն առաջնորդվելով «նախագահական ընտրություններն ավելի կարևոր են» կարգախոսով` չէին հեռանում տարածքից:
«Հայաստանի համար ՌԴ նախագահի ով լինելը միշտ էլ կարևոր է եղել: Ընտանիքիս կեսն այնտեղ է, մյուս կեսն` այստեղ, ինչպես կարող է իմ համար այս ընտրությունները կարևոր չլինեն»,- Sputnik Արմենիային ասաց արհեստավոր Մկրտիչ Հովհաննիսյանը:
Ռաֆայելը 9 տարեկան է, ընտրության եկել էր հայրիկի հետ: Մեր այն հարցին, թե ինչու ես եկել՝ տղան պատասխանեց՝ «Նախագահ ընտրելու, գիտեմ պապան ում է ընտրելու, բայց չեմ ասի»։
Ողջ ընտանիքով ընտրության էին եկել նաև Նասիբյանները: Ընտանիքի հայրը՝ Արմեն Նասիբյանն, այս պահին աշխատում է «Գյումրի» բժշկական կենտրոնում, մայրը՝ Անաստասիան, նույնպես բժիշկ է, ազգությամբ` ռուս, ու արդեն 2-րդ տարին է Գյումրիում են ապրում: «Մենք ընտրության ենք եկել մեր կարծիքը հայտնելու: Սա մեր ու մեր ընտանիքի ապագայի համար է»,-նշեց Անաստասիան, իսկ ամուսինն ավելացրեց. «Այս ընտրությունը կարևոր է ոչ միայն ՌԴ–ի, այլ նաև Հայաստանի ու այն հայերի համար, ովքեր ապրում ու աշխատում են ՌԴ-ում»:
![Избиратели на участке No8031, Гюмри Избиратели на участке No8031, Гюмри - Sputnik Արմենիա](https://cdn.am.sputniknews.ru/img/1095/96/10959637_0:0:1600:1068_600x0_80_0_0_7fea9bf1a9069f62719483b9a364ecbb.jpg)
Մարտի 18–ի ՌԴ նախագահի ընտրական գործընթացը Գյումրիում անցավ բավական ակտիվ ու նորմալ՝ գյումրեցիներն անգամ կատակեցին՝ «Գյումրիում այսօր հայերի 150 տոկոսը ՌԴ նախագահ ընտրեց»:
![ՌԴ նախագահի ընտրություններ. Գյումրի ՌԴ նախագահի ընտրություններ. Գյումրի - Sputnik Արմենիա](https://cdn.am.sputniknews.ru/img/1096/27/10962747_0:0:1386:871_600x0_80_0_0_7722d62377956e46468c84b6eee5fbf7.jpg)
![ՌԴ նախագահի ընտրություններ. Գյումրի ՌԴ նախագահի ընտրություններ. Գյումրի - Sputnik Արմենիա](https://cdn.am.sputniknews.ru/img/1096/18/10961865_0:61:1620:1080_600x0_80_0_0_de0ef3ee58795c432aa33e7542a70652.jpg)
![ՌԴ նախագահի ընտրություններ. Գյումրի ՌԴ նախագահի ընտրություններ. Գյումրի - Sputnik Արմենիա](https://cdn.am.sputniknews.ru/img/1095/99/10959906_0:30:1620:1049_600x0_80_0_0_5d3d9f1ce51e5200a1a220cc82417aa1.jpg)
![ՌԴ նախագահի ընտրություններ. Գյումրի ՌԴ նախագահի ընտրություններ. Գյումրի - Sputnik Արմենիա](https://cdn.am.sputniknews.ru/img/1096/13/10961302_0:30:1620:1049_600x0_80_0_0_1d9d298c7cd0d4a4ad0d5b79345a0994.jpg)
Հիշեցնենք նաև, որ այսօր` մարտի 18-ին, Ռուսաստանում նախագահի ընտրություններ են անցկացվում, բացվել է ավելի քան 97 հազար ընտրատեղամաս, որոնցից ավելի քան 400–ը` երկրի սահմաններից դուրս։
Քվեարկության ընթացակարգին հետևում է մոտ 1.5 հազար միջազգային դիտորդ 109 երկրից։
Ռուսաստանի նախագահի պաշտոնին հավակնում է 8 թեկնածու։